Sentabr oyida Janubiy Koreyaning Incheon shahrida bo‘lib o‘tadigan Osiyo o‘yinlarida ishtirok etadigan O‘zbekiston-U22 terma jamoasiga bosh murabbiy etib Mirjalol Qosimov tayinlandi. Bu haqda “Olamsport” ma’lum qildi.
Bu terma jamoaning dastlabki yig‘ini iyun oyida bo‘lib o‘tishi rejalashtirilgan. Yozgi yig‘in davomida o‘rtoqlik o‘yinlari o‘tkazilishi ko‘zda tutilgan. Ayni paytda bir nechta terma jamoalar bilan muzokaralar olib borilmoqda.
Mirjalol Qo‘shoqovichning ta’kidlashicha, terma jamoa murabbiylar shtabida yana bir murabbiy ish boshlaydi. Yaqin kunlarda bu mutaxassisning nomiga oydinlik kiritiladi. Ko‘p ehtimol bilan bu mutaxassis shu yoshdagi futbolchilar bilan ishlagan murabbiy bo‘ladi.
Incheondagi Osiyo o‘yinlarida 1991-, 1992-, 1993-yilda tug‘ilgan futbolchilar ishtirok etadi. Bundan tashqari, musobaqa reglamentida uch nafar yoshi katta futbolchining qatnashishiga ham ruxsat etilgan. Qosimov bunday imkoniyatdan foydalanadi.
Faqat Osiyo o‘yinlari FIFA kuniga kiritilmagani uchun legionerlar masalasida muammo yuzaga keladi. Bunda mahalliy yoshi katta futbolchilarning Koreyaga borish ehtimoli yuqori bo‘ladi.
Izoh (0)