«Ёшлигимда нуқул ўзбекка эрга тегмайман дердим». Актриса Дилдора Ҳошимова корейс турмуш ўртоғи ислом динини қабул қилгани ҳамда исмини ҳам ўзгартиргани ҳақида (видео)

«Севгинатор», «Кореялик келин», «Зулмат», «Кореядаги муҳаббат» каби фильмлардаги роли орқали мухлислар эътиборига тушган актриса Дилдора Ҳошимова корейс миллатига мансуб бўлган турмуш ўртоғи билан қаерда танишгани, унинг ўзбекча исми, ислом динини қабул қилгани, корейс халқининг маданияти, тўйлари қандай экани ва қизининг ўзига ўхшаши ҳақида гапирди.

Актриса турмуш ўртоғи ва у билан қаерда танишгани ҳақида

«Турмуш ўртоғим корейс миллатига мансуб, исми Сан Ҳюк. «Кореялик келин» фильмида суратга тушишимдан олдин ҳам Кореяда яшар эдим. Қизалоғим 2 ёки уч ёш бўлганда Ўзбекистонга келганман. Турмуш ўртоғим билан Тошкентда танишганман.

Университетда ўқиб юрган пайтларим ҳамма мени корейсларга ўхшатар эди. Оиламизда санъаткорлар бўлмаган. Бувим ҳар доим айтиб юрар эди, бу раққоса бўлади, мен телевизорда кўриб юраман деб. Ёшлигимда раққоса бўлганман, кейинроқ шу йўналишга ўқишга кирдим. Раққосалик йўналишини битираётган вақтим актёрликка қизиқиб қолганман. Кейин тайёргарлик кўриб актёрлик соҳаси бўйича ўқишга кирганман», — дейди актриса.

Корейс миллатининг маданияти ва тўйлари тўғрисида

«Корейслар ўйнамайди, европа ҳитларини, ҳип-ҳоп йўналишида мусиқаларини эшитади. Миллий рақси бор, унда қўлга махсус таёқчалар олиб, миллий услубдаги катта либосларда рақсга тушишади. Корейслар тўйларда ҳам ўйнамайди, тўйлари зерикарли бўлади. Менинг тўйим ҳам зерикарли бўлган. Тўйда ҳамма келиб овқатланади, кейин табриклаб кетади. Бизнинг тўйларимиз жуда чиройли. Турмуш ўртоғим ҳам бир марта Ўзбекистонда тўйлар қандай ўтказилишини кўрди», — дейди актриса.

Актриса турмуш ўртоғининг ўзбекча исми ва ислом динини қабул қилгани ҳақида

«Турмуш ўртоғимнинг ўзбекча исми Яҳё. У ислом динини қабул қилган. Турмуш ўртоғим фирмамнинг бошлиғи ва товарлар билан ҳам шуғулланади. Ўзбек тилида салом беришни билади», — дейди Дилдора Ҳошимова.

Нима сабабдан корейсга турмушга чиққани 

«Уларнинг урф-одати бизникига ўхшаб кетади. Масалан, ота-онасига ҳурмат, меҳр кўрсатади. Лекин корейслар бизникига ўхшаб узоқ қариндошлари билан унчалик ‘борди-келди’ қилмайди. Уларда ҳамма тирикчилик учун ҳаракат қилади, ишлайди.

Мен Кореяни яхши кўрар эдим. Онам доим сенга сеп оламан деб айтар эди, мен эса олманг, мен фақат битта чемадонда кетаман дердим. Шунда онам сен бунақа уруш қилиб юрсанг, сени ҳеч қайси ўзбек олмайди, деб айтар эди. Шунда мен майли, мен ўзбекка эмас, бошқа миллатга мансуб инсонга турмушга чиқаман деганман. Ҳар бир тилак амалга ошади, шунинг учун ҳозир қандайдир дилхиралилик бўлса, вақтга ташлаб қўяман яхши бўлади», — дейди актриса.

Актриса корейслар уни талаффузи билан ажратиб олиши ва қизининг ўзига ўхшашлиги ҳақида

«Корейсча гапирмасам ҳеч ким мени улардан фарқламайди. Гапирганимда эса чет элдан келганимни билиб олишади, чунки уларнинг талаффузи бошқачароқ. Улар олдин мени кореялик қизларнинг чиройли варианти дейишар эди. Қизимни мен билан бир хил дейишади, менга ўхшаса керак», — дейди Дилдора Ҳошимова.