Davlat xavfsizlik xizmati xodimlari tomonidan Asaka tumanida mansabdor shaxslar bilan bog‘liq noqonuniy holatlar aniqlandi.
Qayd etilishicha, DXXning Andijon viloyati bo‘yicha boshqarmasi xodimlari tomonidan tezkor tadbir o‘tkazilgan. Tadbirda Asaka tumani Ichki ishlar bo‘limi tergov bo‘linmasining sobiq xodimi Asaka tumani prokurori o‘rinbosari orqali mazkur tuman prokuraturasi ish yurituvida bo‘lgan jinoyat ishi doirasida, qurilish firmasi rahbariga nisbatan qo‘llanilgan “qamoq” ehtiyot chorasini o‘zgartirib, tergov harakatlari davomida aniqlangan zarar summasini qayta nazorat-o‘lchov tadbirlari o‘tkazish orqali kamaytirib berish evaziga, ayblanuvchining yaqinlaridan 15 ming dollar olayotgan vaqtida ashyoviy dalillar bilan qo‘lga olingan.
Holat yuzasidan to‘plangan materiallar asosida sobiq tergovchiga nisbatan Jinoyat kodeksining 168-moddasi (firibgarlik) 4-qismi “a” bandi va 28, 211-moddasi (pora berish) 3-qismi “a” bandi bilan jinoyat ishi qo‘zg‘atilgan.
Olib borilgan tergov harakatlari davomida tuman prokurori o‘rinbosari ham ushbu jinoyat ishiga ayblanuvchi tariqasida jalb qilingan. Hozirda ularga nisbatan qamoq ehtiyot chorasi qo‘llanilgan.
Boshqa holatda esa Asaka tumani hokimligining qishloq xo‘jaligi bo‘limi boshlig‘i tuman hokimining qishloq xo‘jaligi masalalari bo‘yicha o‘rinbosari topshirig‘iga asosan, unga tegishli chorvachilikka ixtisoslashgan masʼuliyati cheklangan jamiyatga uzoq muddatga ijaraga berilgan yer maydonining 50 sotix qismini sotish hamda tuman kadastr bo‘limi orqali ushbu yer maydonining toifasini noturar joyga o‘zgartirib, hujjatlarini rasmiylashtirib berish evaziga xaridordan 40 ming dollar talab qilgan.
Davlat xavfsizlik xizmati xodimlari tomonidan o‘tkazilgan tezkor tadbirda, tuman hokimligining qishloq xo‘jaligi bo‘limi boshlig‘i oldindan 15 ming dollar olgan vaqtida ushlangan. Shuningdek, tezkor tadbir davom ettirilib, ushbu pul mablag‘idan 5 ming dollarni olgan vaqtida Kadastr agentligining Asaka tuman bo‘limi boshlig‘i ham ashyoviy dalillar bilan qo‘lga olindi.
Hozirda Asaka tuman hokimining qishloq xo‘jaligi masalalari bo‘yicha o‘rinbosari, tuman hokimligining qishloq xo‘jaligi bo‘limi boshlig‘i va Kadastr agentligining Asaka tuman bo‘limi boshlig‘iga nisbatan Jinoyat kodeksining tegishli moddalari bilan jinoyat ishi qo‘zg‘atilgan.
Eslatib o‘tamiz, dekabr boshlarida Davlat xavfsizlik xizmati xodimlari tomonidan o‘tkazilgan tezkor tadbirda Oliy sudning Jinoyat ishlari bo‘yicha sudlov hayʼati katta konsultanti fuqarodan 10 ming dollar olgan vaqtida ushlangan edi.
Izoh (0)