“Barselona”, Messi, Gvardiola, palov, sevimli raqamlar va Toshkent haqida Jasur Yaxshiboyev bilan intervyu

Belarus chempionatining birinchi davra natijalariga ko‘ra, 9 ta gol bilan musobaqa to‘purari bo‘lib turgan o‘zbekistonlik hujumchi Jasur Yaxshiboyev bir necha oy oldin “Pressbol” nashriga Belarusdagi hayoti, “Paxtakor”da Shota Arveladze bilan kelisha olmagani haqida intervyu bergandi. Aynan ushbu nashr Yaxshiboyevni yana bir marta suhbatga tortdi. Bu safar Jasurga asosan blits-savollar berildi.

“Daryo” ushbu intervyuni o‘quvchilarga o‘zbek tilida taqdim etadi.

— Siz tashrif buyurgan eng yorqin shahar?

— Qatar poytaxti Doha. Dubayni ham aytib o‘tgan bo‘lardim. Dubay BAAning eng yirik shaharlaridan biri. O‘ta zamonaviy shahar, u yerda osmono‘par va chiroyli binolar talaygina. “Paxtakor” bilan Osiyo Chempionlar Ligasida, O‘zbekiston Olimpiya terma jamoasi bilan esa o‘rtoqlik uchrashuvi o‘tkazganimizda u yerda bo‘lganman. Biroq men uchun eng sevimli shahar bu — Toshkent.

— Sevimli filmingiz?

— Film tomosha qilishga unchalik ishtiyoqim baland emas. Bo‘sh vaqtimda ko‘proq futbol ko‘rishni yoqtiraman. Ba’zida fantastik kinolar ko‘rib turman. Masalan, Marvel. Aktyorlardan Tom Kruz va Jonni Depp.

— Sevimli taomingiz? Hech qanday ikkilanishsiz, palov bo‘lsa kerak?

— Ha, shunday. O‘zbekistonda u guruch va qo‘y go‘shtidan tayyorlanadi. Tayyorlangan oshning ustiga ot go‘shti ham qo‘yiladi. Taom bodring va pomidordan tayyorlangan salat bilan zo‘r ketadi. Umuman olganda, o‘zbek oilalarida haftaning har payshanba kuni palov tayyorlash an’anasi bor. Belarusda kartoshka qanchalik sevib iste’mol qilinsa, O‘zbekistonda oshni shunday xush ko‘rishadi.

— Sevimli qo‘shig‘ingiz?

— Men o‘zbek musiqasini afzal ko‘raman. Shohruhxon, Munisa Rizayeva. Ular ko‘proq muhabbat haqida kuylaydi. Arab ijrochilarini ham tinglab turaman. Afrikalik jamoadoshlarim fransuzcha rep eshitadi. Garchi, so‘zlarini tushunmasam-da, eshitib turaman.

— Sevimli bayramingiz?

— Ular aniq tug‘ilgan kunim yoki Yangi yil emas, balki musulmonlarning bayrami bo‘lgan Ramazon va Qurbon hayiti eng sevimli bayramlarim. Shuningdek, bahor kelishi bilan bog‘liq bo‘lgan 21-mart – Navro‘z bayrami ham.

— Sevimli raqamingiz?

— 24. Chunki 24-iyun sanasida tug‘ilganman. Yana 7, 9 va 10 raqamlarini yoqtiraman. O‘zbekistonda 9 va 22-raqamlarda o‘ynaganman.

— Ertalab yoki kechki payt?

— Kechki payt. Men ko‘proq uxlashni yoqtiraman. “Energetik-BGU”ning mashg‘ulotlari ertalab soat 8:30 da boshlanadi, unga ertalab uyg‘onib, borishga ko‘nikish qiyin bo‘ldi. Ammo o‘tgan vaqt ichida bunga ko‘nikib qoldim. O‘zbekistonda havo issiq va odatda mashg‘ulotlar kechki payt o‘tkaziladi.

— Divanda yotish yoki ko‘chada aylanish?

— Xo‘sh, nima desam ekan, 50 ga 50. Bu mashg‘ulotlarda qanchalik charchaganimga bog‘liq.

— Sevimli faslingiz?

— Yoz, chunki havo issiq bo‘ladi. Yozda cho‘milish va quyoshda toblanish mumkin. Yana yengil kiyinib yurish ham mumkin. Ha, issiq, ammo baribir yoz boshqacha. O‘zbekistonda bu faslda havo harorati 50 darajagacha ko‘tarilishi mumkin.

— Sevimli jamoangiz? Avvalroq “Barselona” degandingiz.

— Ha. Men bu jamoaga uni Gvardiola boshqargandan beri muxlislik qilaman. Aynan Gvardiola “Barselona”ni o‘yinini o‘zgartirdi, “tika-taka” uslubini joriy qildi. Messi ham uning qo‘l ostida dunyoning eng yaxshi futbolchisi darajasiga chiqdi.

— U sizning eng sevimli o‘yinchingizmi?

— Uni butun dunyoda yaxshi ko‘rishadi. Shuningdek, “Manchester Siti” yarim himoyachisi Riyod Mahrez va “Borussiya D”dan Jeydon Sancho ham yoqadi.

— Futbolchi bo‘lmagan sevimli sportchingiz?

— Muhammad Ali. U shaxs sifatida men uchun namuna. Uning so‘zlari va qilgan amallari tufayli ko‘plab insonlar islomni qabul qilgan.

— O‘zbekistondan tashqari qaysi terma jamoaga muxlislik qilasiz?

— Ispaniya. So‘nggi vaqtlarda ular o‘z darajasida o‘ynay olmayapti. Xavi va Inyesta sabab shu jamoaga muxlislik qilganman. O‘shanda ular Jahon va Yevropa chempioni bo‘lgandi. Ungacha esa Germaniyaning o‘yinlari yoqqan. U butunlay boshqacha uslubga ega. Ular maydonda tartibli o‘yin ko‘rsatadi.

— Sizda eng katta taassurot qoldirgan stadion?

— Qatarning “As-Sadd” klubi arenasi. Bu mamlakat issiq ekanligini hamma biladi. Ammo stadionning ichiga konditsionerlar o‘rnatilgan. Maydonga chiqqaningizda, darhol yoqimli salqin havoni his qilasiz. Agar faqat futbolkada bo‘lsangiz, sovqotib qolishingiz ham mumkin. Ushbu stadionning sig‘imi unchalik katta emas. 15 ming tomoshabinni sig‘dira oladi. Belarusdagi eng yaxshi stadionlar? Minskdagi “Dinamo” va “Borisov-Arena” arenalari.

— Sizning ishtirokingizdagi eng qiziqarli uchrashuv?

— O‘zbekiston milliy terma jamoasining 2018-yildagi Urugvay va Marokashga qarshi kechgan uchrashuvlari. Urugvay bilan o‘yinda Suares, Kavani va Godinga qarshi maydonga tushganman. Marokash bilan o‘yinda esa Hakimi, Bufal, Ziyosh va boshqa taniqli futbolchilar harakat qilgan. Senegalga qarshi bahsda zaxirada qolganman.

— Shioringiz qanday?

— Hech qachon taslim bo‘lmaslik. Har bir insonda qiyin vaziyatlar bo‘ladi. Ammo uni yengib o‘tish kerak. Va har kuni nimaga qodir ekanligingizni isbotlashingiz kerak. Shundagina xohlagan narsangizga erishasiz.