“Yil jamoasi”ga eng ko‘p kirish borasida “Barselona” futbolchilari “Real”ni ortda qoldirdi

UEFA “Yil jamoasi”ga eng ko‘p marta kirgan futbolchilardan ramziy terma tuzib chiqdi, deb xabar berdi tashkilot matbuot xizmati. Undan “Real”ga tegishli 3 nafar, “Barselona”ga tegishli 6 nafar futbolchisi joy oldi.

“Yil jamoasi”ga kirish bo‘yicha Krishtianu Ronalduga yetadigani yo‘q. Portugaliyalik hujumchi 10 marta shunday baxtga muvaffaq bo‘lgan. Lionel Messida esa bu ko‘rsatkich 7 tani tashkil qilmoqda. O‘z vaqtida “Barselona” safida to‘p surgan Tyeri Anri 5 martalik ko‘rsatkich bilan hujum uchligini to‘ldirdi.

Yarim himoyada kataloniyaliklarning ikki afsonaviy futbolchisi — Andrey Inyesta hamda Xavi bor. Har ikkisi ham karyerasi davomida 5 martadan “Yil jamoasi”ga kirib olgan. Bunday baxtga uch bor erishgan Stiven Jerrard mana shu ikki ispan yigitining yonidan joy oldi.

Himoyada ham asosan ispaniyaliklar: Karles Puyol, Xerard Pike va Serxio Ramos. Puyol 6 marta, Ramos 5 marta, Pike esa 4 marta yil yaxshilari safida bo‘lgan. Germaniyalik Filipp Lamda bu ko‘rsatkich 5 taga teng.

“Real” o‘z safida olib qolishni istamagan Iker Kasilyas 6 bor “yil jamoasi” safida bo‘lgan.