Тошкентда «Спутник V» билан эмланаётган аҳоли унинг ҳақиқатда Россия вакцинаси эканига шубҳа билдирмоқда
Тошкентда аҳолини коронавирусга қарши «Спутник V» вакцинаси билан эмлаш бошланди. Кўпчилик эмланаётганлар вакцина номидаги «Гам-КОВИД-Вак» ёзувни кўриб, бу ростдан ҳам Россия вакцинаси эканига шубҳа қилмоқда, деб хабар беради «Подробно».
«Барчани тинчлантирамиз. Агар билмаган бўлсангиз, Россия вакцинасининг расмий номи ‘Гам-КОВИД-Вак’, савдо номи эса ‘Спутник V’. Бу маҳсулот тарғиботи учун махсус ўйлаб топилган чиройли ном», — дейилади хабарда.
Аввалроқ Ўзбекистон Россиядан коронавирусга қарши вакцина етказиб беришни кўпайтиришни ва уни мамлакатда ишлаб чиқариш имкониятини кўриб чиқишни сўрагани тўғрисида хабар берилганди.
Эслатиб ўтамиз, 27 апрель куни Ўзбекистонга «Спутник V» вакцинасининг иккинчи партияси 50 минг дозада олиб келинди. Шунингдек, 23 апрелга ўтар кечаси Ўзбекистонга «Спутник V» вакцинасининг биринчи партияси етказиб берилган эди (айнан қанча миқдорда вакцина олиб келингани маълум қилинмаган). Қайд этиш жоиз, Ўзбекистонга аҳолини эмлаш учун олиб келинадиган «Спутник V»нинг ярмини тадбиркор Алишер Усмонов молиялаштирган. Олдинроқ ушбу вакцинадан жами 1 миллион доза сотиб олиниши кўзда тутилгани маълум қилинган эди.