Голландиянинг The Voice шоусининг русча версияси бўлган «Голос»нинг 9-мавсуми 2020 йилнинг кузида старт олган. Якуний натижага кўра, бошқирдистонлик Яна Габбасова ғолиб деб топилган. Илк марта 2012 йилда эфирга узатилган ва нафақат Россия, балки дунёнинг бошқа бурчакларида ҳам севиб томоша қилинадиган лойиҳанинг барча мавсумларидаги энг ёрқин иштирокчилар ҳаётида қандай ўзгаришлар юз бергани ҳақида маълумот бериб ўтамиз.
Дина Гарипова — 1-мавсум ғолиби
Миллионлаб мухлислар қалбидан жой олиб, биринчи мавсумнинг ғолибига айланган 21 яшар Дина 2013 йилдаги «Евровидение»да 5-ўринни эгаллаган. 22 ёшида эса Татаристондаги энг ёш хизмат кўрсатган хонанда деб топилган. «Голос»дан сўнг бошқа иштирокчилар билан мамлакат бўйлаб гастроль сафарларига чиққан Дина кейинчалик яккахон концерт бера бошлаган. 2015 йилда эса Александр Градский номли мусиқий театрда актриса сифатида фаолият бошлаган ижодкор бугунги кунда ҳам янги қўшиқ ва клиплар тақдим қилиб туради. 4 йил аввал турмушга чиққан хонанда турмуш ўртоғининг исмини сир тутишни абзал билади.
Севара Назархон — 1-мавсум финали иштирокчиси
Ўзбекистонлик Севара мазкур лойиҳада иштирок этгунига қадар ҳам етарлича машҳурлик ва муваффақиятга эришиб бўлган. Репертуарида олтита яккахон альбом бўлган, Питер Гэбриэлнинг АҚШ, Канада ва Европанинг энг катта майдонларида бўлиб ўтган, элликдан ортиқ концертларни ўз ичига олган «Growing Up» номли жаҳон турида иштирок этган, шу билан бирга BBC World Music Award мукофотининг энг яхши осиёлик хонанда йўналиши бўйича ғолиб деб топилган. Лойиҳа давомида аксарият мухлислар Севарага мухлислик қилган ва унинг биринчи бўлишини истаган. «Голос»даги иштирокидан кейин қўшиқчи Россия каналлари орқали эфирга узатиладиган бошқа лойиҳаларда ҳам иштирок этган. 2016 йилда иккинчи марта она бўлган Назархон бир оз муддатдан кейин янги альбоми устида ишлашни бошлаб юборган.
Сергей Волчков — 2- мавсум ғолиби
Иштирокига қадар ҳам бир қанча мусиқий танловларда муваффақиятга эришиб улгурган Сергей ғолиб деб эълон қилинганидан бир неча кун ўтиб ота бўлган. Бугунги кунда у концерт ва янги қўшиқлар тақдим қилишда давом этиш билан бирга, икки нафар фарзандни тарбияламоқда.
Наргиз Зокирова — 2-мавсум финали иштирокчиси
Ҳаётини ўзгартириб юборадиган карьера томон қадам ташлаганида хонанда 42 ёшда бўлган. АҚШда X-factor номли мусиқий лойиҳада иштирок этганидан кейин Наргиз продюсерларнинг қўнғироғини кутиш билан бирга «Голос»да ҳам қатнашиб кўрмоқчи бўлган. Иштирокидан кейин мухлислар уни энг яхши деб топилишига умид қила бошлаган.
Шоудан кейин Наргиз Максим Фадеев билан ҳамкорлик қила бошлаган. Карьера борасида омади чопган хонанда янгидан-янги қўшиқлар тақдим қилишдан чарчамайди. Кўплаб гастроль сафарларига борадиган ва яккахон альбом ёзишга улгурган Наргизнинг ҳаётида ҳам ўзгариш юз берган. У 20 йил бирга яшаган турмуш ўртоғи, италиялик Филипп Бальзано билан ажрашган.
Тина Кузнецова — 2-мавсум финали иштирокчиси
Болалигидан мусиқа билан шуғулланган ва фольк-гуруҳига асос солган Тина асосан миллий йўналишдаги қўшиқларни куйлаган. Юрий Усачевнинг рафиқаси бўлган Кузнецованинг Габриэль исмли фарзанди бор. Янги қўшиқлар ёзишдан чарчамайдиган хонанда Россия бўйлаб концертлар тақдим қилиб туради.
Андрей Давидян — 2-мавсум иштирокчиси
Ширали овози билан мухлисларни «сеҳрлаш»га муваффақ бўлган Давидян чорак финалдан кейин лойиҳани тарк этган. Аммо бу билан карьераси тўхтаб қолмаган. Ижод қилиш ва қўшиқ ёзишда давом этган Андрей эсда қоларли концерт дастурлари беришга ҳам муваффақ бўлган. 2016 йилнинг ноябрида Давидян юрак хуружидан вафот этган.
Александра Воробьёва — 3-мавсум ғолиби
Ғолиб деб топилганидан кейин Александра мухлисларга кўриниш бермай қўйган. Гастроль сафарларига чиқишдан ташқари Воробьёва театрда ҳам фаолият олиб бора бошлаган.
Мариам Мерабова — 3-мавсум финали иштирокчиси
Лойиҳадаги иштирокидан кейин «Евровидение»да Дима Биланга бэк-вокалист сифатида ёрдам берган Мариам бугунги кунда жаз йўналишидаги концертларини тақдим қилиб келади. Шоудан сўнг ижодкор 53 кг вазн ташлаган.
Иеромонах Фотий — 4-мавсум ғолиби
Ғолиб деб топилганидан кейин Фотий Universal Music Russia билан шартнома имзолаган ва Lada XRay машинасининг калитини қўлга киритган. Лойиҳа тугаганидан кейин у аввал фаолият юритганидек черковга қайтган ҳамда черков хорида қўшиқ куйлашда давом этган.
Регина Тодоренко — 4-мавсум иштирокчиси
«Орёл и решка» кўрсатувининг машҳур бошловчиларидан бири бўлган Регина шоудан аввал «Юлдузлар фабрикаси»да ҳам иштирок этиб улгурган. 2018 йилда хонанда Влад Тополовга турмушга чиққан Тодоренка шу йилнинг декабрь ойида фарзандли бўлган.
Дарья Антонюк — 5-мавсум ғолиби
Дарья талабалик даврида лойиҳада иштирок этиш учун келган. Аввалроқ «Изқувар» сериалида суратга тушган Антонюк 2017 йил «Евровидение»да Россия номидан иштирок этиш учун энг асосий номзодлардан бири бўлган. Аммо номзодлар орасидан у эмас, Юлия Самойлова танлаб олинган.
Селим Алахяров — 6-мавсум ғолиби
Лойиҳада иштирок этгунига қадар Алахяров «Россиянинг олтин овози» лойиҳасида 100 нафар иштирокчи орасида энг яхшиси деб топилиб, Гран-прини қўлга киритган. Ҳайъат аъзоларидан Любовь Казарновская Селимнинг истеъдодига мафтун бўлган ва лойиҳадан кейин уни «Юлдуз билан дуэт» лойиҳасига стажировкага таклиф қилган. Алахяров «Голос» шоусида ғолиб бўлган илк кавказлик иштирокчи ҳисобланади.
Мавзуга доир:
- «Бу ҳаётимдаги энг муҳим даврлар эди». Севара Назархон «Ипподром»да чой сотиб, пул топгани ҳақида гапирди
- Наргиз Зокировадан Вин Дизелгача: Кал юлдузлар сочи бор пайтда қандай кўринишга эга бўлган? (фото)
- «Шайтанат»даги Ҳонгирейдан Зарина Низомиддиновагача: Россияда яшаётган ўзбекистонлик машҳурлар (фото)
- Наргиз Зокирова Россиядан нафратланиши ҳақидаги гап-сўзлар бўҳтон эканлигини маълум қилди