Самарқандда ўзганинг шахсий маълумотларини TikTok’да тарқатиш билан қўрқитиб, товламачилик қилган фуқаролар қўлга олинди. Бу ҳақда «Дарё»га вилоят ИИБ ахборот хизмати маълум қилди.
Таъкидланишича, Сирдарё вилоятининг Ховос туманида яшовчи 1989 йилда туғилган А. исмли фуқаро Ички ишлар бўлимига ариза билан мурожаат қилиб, 2021 йилнинг 26 январь куни телефонига номаълум шахс қўнғироқ қилиб, ўзини самарқандлик Федя деб таништиргани ҳамда таниши Б. исмли фуқаро билан ўртасидаги шахсий суҳбатлар, фотосурат ва видеотасвирларни TikTok’даги саҳифасида тарқатиш билан қўрқитиб, эвазига 1 миллион сўм талаб қилаётганини билдирган.
2021 йил 27 январь куни вилоят ИИБ тезкор вакиллари томонидан ўтказилган тадбир давомида Тойлоқ туманининг Жумабозор қишлоғида яшовчи 1998 йилда туғилган Б.Ф. ва 1992 йилда туғилган Ф.Б. фуқаро А.га тегишли бўлган симкартани талаб қилинган 1 миллион сўмга сотаётган вақтида ушланиб, ҳужжатлаштириб олинган.
Вилоят ИИБ ахборот хизмати хабарига кўра, ҳолат юзасидан Жиноят кодексининг 165-моддаси (товламачилик) 2-қисми «в» банди билан жиноят иши қўзғатилиб, тергов-суриштирув ишлари олиб борилмоқда.