Арманистон ва Озарбайжон Мудофаа вазирликлари бир-бирини Тоғли Қорабоғда ўт очишни тўхтатиш режимини бузишда айблади. Бу ҳақда Meduza хабар бермоқда.
Арманистон Мудофаа вазирлиги Озарбайжон қуролли кучлари Арманистоннинг Сюник вилояти ҳудудига ракета зарбаси берганини таъкидламоқда.
Арманистон Мудофаа вазирлиги матбуот котиби Шушан Степаняннинг маълум қилишича, Озарбайжон қуроли кучлари 10 октябрь куни тузилган Тоғли Қорабоғда ўт очишни тўхтатиш сулҳини бузди. Озарбайжон вакиллари буни рад этмоқда.
Озарбайжон Мудофаа вазирлиги ўз навбатида «Тертер ва Агдам вилоятлари ҳудуди душман томонидан ўққа тутилаётганини» маълум қилган. Арманистон Мудофаа вазирлигида бу ҳақиқатга зид деб айтилмоқда.
Эслатиб ўтамиз, Тоғли Қорабоғда кенг қамровли жанговар ҳаракатлар 27 сентябрдан буён давом этмоқда. Озарбайжон ва Арманистон 10 октябрь куни соат 12:00 дан бошлаб Тоғли Қорабоғда ўт очишни тўхтатиш тўғрисида келишиб олганди.