Классик автомобилларни қидириш ва уларнинг савдоси билан шуғулланувчи LBI Limited компанияси бешта Alfa Romeo ўрин олган эски гараж топилганини маълум қилди. Моделлардан иккитаси 40 йилдан буён минилмаган, деб хабар беради Carakoom.
«Дўстларимиздан бири Пенсильвания марказий қисмидаги омборлардан бирида узоқ вақтдан бери турган эски Alfa Romeo’лар ҳақида маълум қилди. Бу каби гап-сўзлар камдан кам ҳолларда одамни бирор натижага элтади, бироқ бу сафар бошқача бўлди. Биз автомобилларини сотишга рози бўлган ушбу гараж эгасини қидириб топдик», — дейилади хабарда.
Мазкур автомобиллар ҳозирги эгасига оиласининг қайсидир аъзосидан мерос бўлиб қолган. Бешта автомобилнинг учтаси атрофи ўралган бўлиб, машиналар «тириклай кўмилган»дек гаражга кириш қисми фанерлар билан ёпиб ташланган бўлган. Маълум бўлишича, ушбу гараж ичидан 1967 йилги Giulia, 1969 йилги Berlina ва 1976 йилги Alfetta ўрин олган.
Иккинчи гаражда эса яна иккита автомобиль бўлган — Giulietta Sprint (1959 йил) ва Giulietta Spider (1959 йил). Иккаласи ҳам бу ерга 40 йил олдин олиб кирилган. Ҳозирда бешта автомобилнинг барчаси LBI Limited автосалонига кўчирилган бўлиб, улар ўзининг янги эгасини кутмоқда.