Наманганда Туркиянинг Çalık Enerji компанияси чиқиндидан энергия ишлаб чиқариш лойиҳасини амалга оширишни режалаштирмоқда. Бу ҳақда «Дарё» мухбири Азизбек Абдувалиев хабар берди.
Вилоят Инвестициялар ва ташқи савдо бошқармасида бўлиб ўтган учрашувда турк компанияси томонидан Наманганда умумий қиймати 40 миллион доллар бўлган чиқиндини қайта ишлаш эвазига 15 мегаваттгача бўлган миқдорда электр энергияси ишлаб чиқариш лойиҳаси муҳокама қилинди.
Туркиялик инвесторга вилоятнинг Чуст, Норин, Уйчи туманлари ҳамда Наманган шаҳридаги чиқинди полигонлари кўрсатилди ҳамда ушбу полигонлар бўйича тўлиқ маълумотлар тақдим этилди.
Муҳокамалар якунига кўра, инвестор томонидан ушбу лойиҳани Наманган шаҳрида жойлашган чиқинди полигонида амалга ошириш лойиҳаси танланди.
Маълумот учун, Çalık Enerji компанияси Тўрақўрғон иссиқлик электр станцияси қурилишида бош пудратчи сифатида иштирок этганди.