Япония коронавирус оқибатларига қарши курашиш учун яна 929 млрд доллар ажратиши мумкин

Япония ҳукумати жорий йилда коронавирус пандемиясининг иқтисодий оқибатларига қарши курашиш учун 100 триллион иенадан (929,45 миллиард доллар) ортиқ иккинчи қўшимча бюджетни шакллантириш имкониятини кўриб чиқмоқда, деб хабар беради Nikkei.

Пандемиядан азият чеккан фирмалар учун паст фоизли кредитлар бериш схемаларини кенгайтириш учун бюджетдан 60 триллион иен ва бошқа молиявий ёрдам дастурлари учун 27 триллион иена ажратилади. Тахминларга кўра, ҳукумат мазкур бюджетни Вазирлар маҳкамасининг 27 май куни ўтказиладиган йиғилишида тасдиқлайди.

Эслатиб ўтамиз, Япония 25 майдан бошлаб фавқулодда ҳолат режимини бекор қилди. Мамлакатда 16 мингга яқин одам коронавирусга чалинган, 808 киши вирус қурбонига айланган. Синдзо Абэ ҳукумати томонидан тасдиқланган инқирозга қарши чораларнинг биринчи пакети 1,09 триллион долларга баҳоланганди.

Ўзбекистонда Президент Шавкат Мирзиёев апрель ойининг бошида коронавирус пандемияси шароитида аҳоли, иқтисодиёт ва тадбиркор субъектларини қўллаб-қувватлаш бўйича фармонни имзолади. Фармонга кўра, аҳолини ижтимоий ҳимоя қилишни кучайтириш ва иқтисодиёт тармоқлари фаолият кўрсатишининг барқарорлигини таъминлаш, шунингдек, айрим хўжалик юритувчи субъектларни қўллаб-қувватлаш мақсадида бир қатор енгилликлар берилди. 24 апрель куни эса Президент пандемия шароитида аҳоли ва тадбиркорларни қўллаб-қувватлаш бўйича навбатдаги фармонни имзолаганди. 13 май куни Шавкат Мирзиёев тадбиркорлар ва аҳолини қўллаб-қувватлаш бўйича янги чораларни маълум қилганди.