Сардоба сув омборида 1 май куни тонг соат 5:55 да юз берган авария ҳолати — техноген ҳодиса. Бу ҳақда Ўзбекистон сув хўжалиги вазири ўринбосари Воҳиджон Аҳмаджонов «Xabar.uz» нашрига берган интервьюсида таъкидлаб ўтди.
Аҳмаджоновнинг таъкидлашича, вазирлик ҳузурида «Давсувхўжаликназорат» инспекцияси мавжуд, бу ташкилот Ўзбекистонда мавжуд барча йирик сув иншоотларининг техник ҳолатини текшириб туриш вазифасини бажаради.
«Агар сув омборларида бирор камчилик аниқланса, тегишли ташкилотларга маълум қилинади. Инспекция қошида диагностика маркази бор, у йирик сув иншоотларини ҳар беш йилда текшириб, хавфсизлик декларацияси қабул қилади», — деди у.
Аввалроқ Сардоба сув омборидаги аварияга, мутахассислар фикрича, кучли ёмғир ва шамол сабаб бўлганини маълум қилинган эди (айнан қайси мутахассислар шундай хулосага келгани айтилмаган). Сув хўжалиги вазири ўринбосари ҳам бу фикрни маъқуллади.
«Сардобадаги ҳодиса, мутахассислар айтганидек, кучли ёмғир ва шамол натижасида вужудга келган тўлқин лойиҳавий режадан ортиқ бўлиши натижасида келиб чиққан. Бу техноген ҳодиса дейилади», — деди Воҳиджон Аҳмаджонов.
Мавзуга доир:
Президент Шавкат Мирзиёев айни вақтда Сирдарё вилоятида бўлиб турибди; давлат раҳбари «шароит яхшиланмагунича бирорта раҳбар ҳеч қаерга кетмаслиги»ни таъкидлаган.
Изоҳ (0)