«Ўзбекэнерго» АЖда Россия энергетика вазирлиги департаменти бошлиғи Алексей Кирьяков ҳамда «Интер РАО ЕЭС» компанияси вакили Сергей Переведенцев билан жамият раҳбарияти ўртасида учрашув бўлиб ўтди. Бу ҳақда «Халқ сўзи» хабар берди.
«Ўзбекэнерго» АЖ матбуот хизматига кўра, учрашувда томонлар ўзаро ҳамкорлик алоқаларини янада ривожлантириш, иссиқлик электр станцияларини модернизация қилиш, янги электр энергия ишлаб чиқариш қувватларини ҳамкорликда қуриш масалаларини муҳокама қилган.
Энергетика соҳасида ўзаро алоқаларни мустаҳкамлаш икки томон учун ҳам манфаатли эканлиги таъкидланиб, бу борада қилиниши лозим бўлган масалаларга алоҳида эътибор қаратилди.
Хусусан, ўзаро мулоқотда «Тошкент ИЭС», «Навоий ИЭС», «Тахиатош ИЭС» ва «Ангрен ИЭС»да жами 18 та энергоблокни модернизация ва реконструкция қилиш ҳамда «Ўзбекэнерго» АЖнинг «Ангрен ИЭС» ва «Янги Ангрен ИЭС»га ишончли ва инновацион бошқарувга ўтиш учун ўзаро ҳамкорлик алоқаларини амалга ошириш борасидаги масалалар юзасидан фикр алмашилди.