Жанубий Корея собиқ президенти Пак Кин Хега нисбатан илгари сурилаётган 20 та айбловлар бўйича суд қарори 6 апрель куни эълон қилинади, деб хабар беради «ТАСС».
«Жанубий Корея собиқ президенти Пак Кин Хе иши бўйича биринчи инстанциянинг суд қарори 6 апрель куни эълон қилинади», — дейилади хабарда.
Пак Кин Хе устидан суд иши 354 кун аввал бошланган.
Қайд этилишича, ушбу ишнинг кўлами ва жамиятдаги аҳамияти даражасини ҳисобга олган ҳолда суд қарори тўғридан-тўғри эфирда намойиш этилиши мумкин. Қарор ўқиб эшиттирилаётган пайтда Пак Кин Хенинг ўзи суд залида бўлмайди.
Маълумот учун, мамлакатнинг собиқ президенти атрофидаги сиёсий можаро 2016 йилнинг октябрь ойида бошланган эди.