Испанияда бўлиб турган Ўзбекистон футбол федерацияси президенти Умид Аҳмаджонов «Реал Мадрид» футбол академияси директори Хулио Ронко билан учрашди.
«Қироллик клуби» ўзига қарашли бўлган ва дунёнинг бошқа чеккаларида жойлашган академияларини Real Madrid Foundation Clinic дастури асосида тартибга солади. ЎФФ ва «Реал» футбол мактаби директорлари ўртасидаги суҳбатда шу масала кўтарилди ва унинг Ўзбекистонда тадбиқ этилиши келишиб олинди.
Дастур асосида Мадриддаги академияда фаолият олиб бораётган бир қатор тажрибали мураббийлар Ўзбекистонга келади ва маҳаллий мутахассисларга машғулотларни қандай олиб бориш ва қандай ишлаш борасида мастер-класс ўтаб беради. Уларнинг тажрибаси болалар билан ишлаб келаётган ўзбекистонлик ёш мураббийларга ас қотади.
«Реал Мадрид» академиясидан ташриф буюрадиган мураббийлар Ўзбекистондаги футбол мактабларини Испания тажрибаси асосида йўлга қўйишга ҳаракат қилади. Уларнинг ёрдамида янгича услубда машғулотлар ўтказиш кўзда тутилган.
Аввалроқ Умид Аҳмаджонов Испания футбол федерацияси раҳбарияти билан кўришиб, ЎФФ ишини тартибга солиш миссиясида улар билан ҳамкорлик қилишга келишиб олганди. Унга кўра, бир қатор ўзбекистонлик мутахассислар шу йилнинг март ойида Испанияга боради ва иш ўрганади.ЎФФ иш услуби Испания футбол федерациясиники каби бўлади. Умид Аҳмаджонов испанлар билан келишувга эришди
Изоҳ (0)