Леонардо Ди Каприо Владимир Путин ҳақида ҳикоя қилувчи фильмда Россия президенти ролини ўйнашга розилик берди. Бу ҳақда фильмни ишлаб чиқариш билан шуғулланаётган Knightsbridge Entertainment’га (Буюк Британияда рўйхатдан ўтган ва Америка, Европа, Осиёда ваколатхоналарига эга мустақил кинокомпания) яқин икки манба маълум қилди, дея хабар беради «Дождь» телеканали.
«Путин» деб номланган фильм лойиҳаси компания сайтида жойлаштирилган бўлиб, унга Марк Деймон продюсерлик қилмоқда. Кинокомпания вакили Валерий Сааряннинг таъкидлашича, ҳозирда якуний кўриниши устида ишланаётган фильм сценарийси уч муаллиф томонидан ёзилмоқда, унинг режиссёрини эса «ҳамма билади».
Фильм кастингида Голливуднинг бир неча юлдузлари иштирок этмоқда. Суратга олиш ишлари 2016 йил баҳорида бошланиб, Россия, Америка ва Европада бўлиб ўтади. «Путин» 2017 йил баҳорида экранларга чиқиши режалаштирилган.
Сааряннинг айтишича, фильм жанри сиёсий триллер бўлиб, унда «дунёнинг энг қудратли инсонларидан бири шахсий ҳаёти ва карьерасига нигоҳ ташланади».