O‘zbekistonda 26-iyul soat 10:00 holatiga ko‘ra 9283 nafar bemorga shifokorlar tomonidan belgilangan standartlar bo‘yicha davo choralari ko‘rilmoqda, deya xabar bermoqda Sog‘liqni saqlash vazirligi.
Ushbu bemorlarning qanchasida kasallik simptomlarsiz (alomatlarsiz) kechayotgani, qanchasi kasalxonalarda davolanayotgani haqida SSV axborotida ma’lum qilinmagan.
Sog‘liqni saqlash vazirligidan qo‘shimcha qilishicha, ayni vaqtda davolanayotgan 9283 nafar bemordan 196 nafarining ahvoli og‘ir, shundan 63 nafarining ahvoli o‘ta og‘ir deb baholanmoqda.
Qayd etish joiz, 25-iyul yakunlariga ko‘ra ham O‘zbekistonda og‘ir ahvoldagi bemorlar soni 196 nafar edi. 26-iyul kuni tongida Buxoroda koronavirusga chalingan 57 yoshli bemor vafot etgani e’lon qilindi.
Ma’lumot uchun, 26-iyul soat 10:00 holatiga ko‘ra O‘zbekistonda koronavirus infeksiyasini yuqtirib olish bilan bog‘liq jami 20 226 ta holat aniqlangan, bemorlarning 10 831 nafari sog‘ayib bo‘lgan.
Izoh (0)