2016-yilning avgustida Toshkent va Buxoroni bog‘laydigan tezkor temir yo‘l qatnovi ishga tushiriladi. UzDaily nashrining bildirishicha, bu haqda bugun, 19-aprel kuni O‘zbekiston Bosh vaziri Shavkat Mirziyoyev Qandim gazni qayta ishlash majmuasiga tamal toshini qo‘yishga bag‘ishlangan marosimda ma’lum qilgan.
Uning so‘zlariga qaraganda, Toshkent va Buxoro o‘rtasida tezkor temir yo‘l qatnovi 20-avgustdan boshlanadi. Yangi tezkor temir yo‘l liniyasi 25-avgustda foydalanishga topshiriladi.
“O‘zbekiston temir yo‘llari” AJ 2015–2016-yillarda “Samarqand–Buxoro” temir yo‘l uchastkasini elektrlashtirish loyihasini amalga oshirmoqda; bu Toshkent va Buxoro o‘rtasida tezkor poyezdlar qatnovini tashkil etishga yordam beradi. Loyiha qiymati 400 million dollarga teng.
Loyiha amalga oshirilgach, “Toshkent–Buxoro” yo‘nalishi bo‘yicha ikkita tezkor poyezd yura boshlaydi. Yo‘lga sarflanadigan vaqt ikki barobarga qisqarib, 7–8 soatdan 3,5 soatga tushadi.
Shuningdek, loyiha yoqilg‘i sarf-xarajatini qisqartirish, ekologiyaga keltiriladigan zararni bir qadar kamaytirish imkonini beradi. O‘z navbatida, yo‘lovchi va yuk tashish hajmi oshadi.
Izoh (0)