Xotira va qadrlash kuni munosabati bilan Ikkinchi jahon urushi qatnashchilari pul mukofoti bilan rag‘batlantiriladi

9-may umumxalq bayrami — Xotira va qadrlash kuni o‘tkazilishi, shuningdek, 1941–1945-yillardagi Ikkinchi jahon urushida fashizm ustidan qozonilgan g‘alabaning 71 yilligi nishonlanishi munosabati bilan urush qatnashchilari va nogironlari moddiy rag‘batlantiladi. Bu O‘zbekiston Respublikasi Prezidentining 18-aprel kuni e’lon qilingan “Ikkinchi jahon urushi qatnashchilarini rag‘batlantirish to‘g‘risida”gi farmonida ko‘zda tutilgan, deb xabar beradi O‘zA.

Hujjatda aytilishicha, bayram munosabati bilan 1941–1945-yillardagi Ikkinchi jahon urushi qatnashchilari va nogironlariga 800 ming so‘m miqdorida bir martalik pul mukofoti beriladi. Farmonni bajarish bilan bog‘liq sarf-xarajatlar respublika budjeti mablag‘lari hisobidan amalga oshiriladi.

Bundan tashqari, O‘zbekiston Respublikasi Mudofaa vazirligi, Ichki ishlar vazirligi, Milliy xavfsizlik xizmatiga Moliya vazirligi va Markaziy bank bilan birgalikda ushbu pul mukofotining tantanali va bayramona vaziyatda topshirilishini ta’minlash, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklariga esa Madaniyat va sport ishlari vazirligi, Mudofaa vazirligi, Ichki ishlar vazirligi, Xotin-qizlar qo‘mitasi, “Kamolot” yoshlar ijtimoiy harakati, Badiiy akademiya, Respublika Ma’naviyat targ‘ibot markazi, “Nuroniy” va “Mahalla” jamg‘armalari, boshqa jamoat tashkilotlari bilan birgalikda yurt himoyachilariga bag‘ishlangan maxsus uchrashuvlar va ma’rifiy-badiiy kechalar o‘tkazish topshirildi.