“Bunyodkor” stadioni o‘z bag‘riga necha ming futbol muxlisini sig‘dira olishiga qiziqib ko‘rganmisiz? Nima uchun futbol bo‘yicha O‘zbekiston milliy terma jamoasi o‘yinlariga chiptalarni xarid qilish qiyin va ular nisbatan qimmat? Ushbu savollarga javob topish maqsadida “Daryo” muxbiri “Bunyodkor” stadioni direktori Vohid Zokirov bilan muloqotda bo‘lib, yuqoridagi savollarga javob oldi.
“‘Bunyodkor’ stadioni o‘z bag‘riga 34 ming kishini sig‘dira oladi. Stadion o‘rindiqlari 29 mingdan ziyod futbol muxlisiga mo‘ljallangan bo‘lsa, yana 1 700 kishi VIP xonalardan, 420 nafari esa restorandan joy olishi mumkin. Qolgan o‘rindiqlar o‘yin vaqtida xavfsizlikni ta’minlab beruvchi militsiya xodimlari uchun ajratilgan” , — deb ma’lum qildi Vohid Zоkirov.
O‘zbekiston terma jamoasi o‘yinlariga chiptalarni xarid qilish qiyinligi haqidagi savolga Vohid Zоkirov quyidagicha izoh berdi.
“Chiptalarni xarid qilish qiyin emas. Istasangiz 5 ta yoki bo‘lmasa 10 ta chipta ham olishingiz mumkin. Ammo, ularni qayta sotib yubormasligingizga kim kafolat beradi? Futbol ‘muxlislari’ning (ya’ni olib-sotarlarning) fantaziyasi juda yuqori. Sizga bir misol keltiray. Olib-sotarlar qo‘lida farzandi bor ayolni yolladi va u navbatsiz, deylik 5 ta chipta xarid qildi. O‘sha ayol chiptalarni farzandlarimga olyapman deydi. Biroq uning chiptalarni haqiqatan ham farzandlari uchun sotib olganini aniqlash qiyin. Yaxshiyamki stadion atrofida ko‘plab kameralar o‘rnatilgan va 15 daqiqa o‘tar-o‘tmas IIB xodimlari chiptalarni qayta sotayotgan ayolni qo‘lga oldi. Shuningdek, muxlislar e’tibordan chetda qolib ketmasligi va sun’iy ravishda vujudga keltiriladigan chipta tanqisligining oldini olish maqsadida stadion chiptaxonalariga maxsus mikrofonlar o‘rnatilgan bo‘lib, sotuvchi chiptaxonalarda bilet borligi haqida ma’lum qilib turadi. Chiptaxonadan tarqaladigan ovoz uzoq masofalarga eshitiladi” — dedi “Bunyodkor” stadioni direktori .
Shuningdek, stadion direktori “Bunyodkor” chiptalarini qalbakilashtirib bo‘lmasligi va ularning xususiyatlari haqida ma’lumot berdi.
“‘Bunyodkor’ chiptalari maxsus termokartondan yasalgan bo‘lib, bunday mahsulot O‘zbekistonda ishlab chiqarilmaydi. Hozirgi kunda bunday texnologiya asosida yasalgan chiptalar temir yo‘l vokzallari, aeroportlar va bizda bor. Har bir chiptaning qiymati biroz qimmat bo‘lsa-da, biz xotirjamlik bilan ularni bir oy avval ham tayyorlab qo‘yishimiz va o‘yindan 10 kun avval sotuvga qo‘yishimiz mumkin. Chunki ularni qalbakilashtirib bo‘lmaydi. Birinchidan, chiptada maxsus hoshiya mavjud. Ikkinchidan, chiptadagi yozuvlar bo‘yoq bilan emas, lazer yordamida yoziladi. Shuningdek, termokarton asosida yasalgan ushbu chiptalar olovga chidamli hisoblanadi”, — deb izoh berdi Vohid Zokirov.
Izoh (0)