Qirg‘iziston bosh vaziri Temir Sariyev iste’fo berdi. Bu haqda u 11-aprel, dushanba kuni vazirlar mahkamasining navbatdan tashqari yig‘ilishida ma’lum qildi, deya xabar beradi “TASS”.
Bir necha kun avval mamlakat transport va kommunikatsiyalar vaziri Arg‘inbek Malabayev bosh vazir va uning atrofidagilarni Baliqchi—Korumdu avtoyo‘li qurilishi tenderini o‘tkazishda Xitoy kompaniyalaridan biri manfaatlarini ko‘zlaganlikda ayblagandi. Mazkur ayblov tafsilotlarini o‘rganish uchun deputatlarning maxsus komissiyasi tuzilgan va ushbu komissiya parlamentga 13-aprel, chorshanba kuni Sariyevga ishonchsizlik bildirish masalasini qo‘yishni tavsiya qilgandi.
Temir Sariyevning aytishicha, avtoyo‘l qurilishi tenderi bo‘yicha deputatlik komissiyasi yig‘ilishi yopiq eshiklar ortida o‘tgan va u chiqargan qaror adolatsizdir.
“Ishni topshirishdan qochmayman, biroq halol ishlaganligim va hech qachon tuban siyosiy fitnalarda ishtirok etmaganligimni isbotlayman. Men uchun davlat manfaatlari hamma narsadan ustun. Bu tamoyilga doim amal qilaman va barcha asossiz ayblovlarni mehnatim bilan inkor etishga tayyorman”, — deya ta’kidlagan Sariyev.
Eslatib o‘tamiz, oldinroq Ukraina bosh vaziri Arseniy Yatsenyuk iste’foga chiqishini ma’lum qilgandi.
Izoh (0)