2016-yil 8-aprel kuni Toshkent shahrida Shanxay hamkorlik tashkiloti Mintaqaviy aksilterror tuzilmasi (ShHT MATT) Kengashining navbatdagi yigirma sakkizinchi majlisi bo‘lib o‘tdi. Qozog‘iston raisligida tashkil etilgan majlisda Qozog‘iston, Xitoy, Qirg‘iziston, Rossiya, Tojikiston va O‘zbekiston vakillari ishtirok etdi, deb xabar beradi O‘zA.
Majlisda ShHTga a’zo davlatlarning terrorizm, separatizm va ekstremizmga qarshi kurashish bo‘yicha 2013–2015-yillarga mo‘ljallangan hamkorlik dasturini amalga oshirish yakunlari va ShHT MATT Kengashi qarorlari ijrosi muhokama qilindi.
ShHTga a’zo davlatlar vakolatli organlarining internet tarmog‘idan terrorizm, separatizm va ekstremizm maqsadlarida foydalanish holatlarini aniqlash va ularning oldini olish bo‘yicha Xitoyda o‘tkazilgan “Syamin – 2015” birgalikdagi o‘quv mashqlari yakunlariga yuqori baho berildi.
Shuningdek, 2016-yilning IV choragida ShHTga a’zo va kuzatuvchi davlatlar delegatsiyalari ishtirokida xalqaro terrorizm va ekstremizmga qarshi kurashish sohasidagi hamkorlik masalalariga bag‘ishlangan to‘rtinchi ilmiy-amaliy konferensiyani o‘tkazishga kelishildi.
ShHT MATT Ijroiya qo‘mitasi faoliyatini tashkiliy va kadrlar bilan, moliyaviy ta’minlash, ShHTga a’zo davlatlarning terrorizm, separatizm va ekstremizmga qarshi kurashish sohasidagi hamkorligining huquqiy asoslarini yanada takomillashtirishga doir masalalar yuzasidan qarorlar qabul qilindi.
Izoh (0)