Xitoyning Sian An shahrida boks bo‘yicha Rio–2016 Olimpiada o‘yinlari yo‘llanmalari uchun Osiyo va Okeaniya mintaqalarining qo‘shma litsenzion turnirida o‘zbekistonlik Yodgoroy Mirzayeva Olimpiada yo‘llanmasini qo‘lga kiritdi. Bu haqda O‘zbekiston Milliy olimpiya qo‘mitasi matbuot xizmati xabar bermoqda.
-51 kilogramm vazn toifasida ishtirok etayotgan Yodgoroy Mirzayeva yarim final bahsida Xitoy Taypeyi vakili Lin Yu Tindan 2:1 hisobida ustun kelib, musobaqa finali va eng asosiysi Rio—2016 Olimpiada o‘yinlariga yo‘llanma oldi.
Shu tariqa, Yodgoroy Mirzayeva O‘zbekiston xotin-qizlari orasida boks bo‘yicha Olimpiada o‘yinlarining yo‘llanmasini qo‘lga kiritgan birinchi sportchi bo‘ldi.
Avvalroq, -49 kilogramm vazn toifasida ishtirok etayotgan o‘zbekistonlik bokschi Hasanboy Do‘smatov yarim finalda mo‘g‘ulistonlik Gan-Erden Ganxuyagni 3:0 hisobida mag‘lub etib, musobaqa finali hamda Rio–2016 Olimpiada o‘yinlariga yo‘llanma olgani haqida xabar berilgan edi.
Eslatib o‘tamiz, bugun, 31-mart kuni yana besh nafar o‘zbekistonlik bokschi Olimpiada o‘yinlarining yo‘llanmasi uchun ringga ko‘tariladi.
Izoh (0)