Filippin ustidan 1:0 hisobida g‘olib chiqqaniga qaramay, futbol bo‘yicha O‘zbekiston milliy terma jamoasi Jahon chempionati—2018 saralashining navbatdagi bosqichiga yo‘llanma olgani yo‘q. Futbol bo‘yicha BAA chempionatida maslahatchi sifatida faoliyat yuritayotgan o‘zbekistonlik mutaxassis Alisher Nikimbayevning Facebook’dagi sahifasida yozishicha, agar Tailand Iroqqa qarshi saralash o‘yini so‘nggi daqiqasida o‘z darvozasiga gol urmaganida edi, O‘zbekiston saralashning uchinchi bosqichiga yo‘llanmani qo‘lga kiritib bo‘lgan bo‘lardi.
Nazariy jihatdan olib qaraganda O‘zbekiston 3-saralash bosqichida ishtirok etadigan 12 ta terma jamoa qatoriga kira olmasligi ham mumkin. Buning uchun, Nikimbayevning yozishicha, quyida sanab o‘tilgan holatlarning barchasi ro‘y berishi kerak:
- O‘zbekiston milliy terma jamoasi o‘z maydonida Bahraynga imkoniyatni boy berishi;
- KXDR terma jamoasi safarda Filippin ustidan zafar quchishi;
- BAA terma jamoasi o‘z maydonida Saudiya Arabistoni termasini yengishi;
- Suriya terma jamoasi safarda Yaponiyadan yengilmasligi yoki minimal hisobda imkoniyatni boy berishi;
- Iordaniya terma jamoasi safarda Avstraliyani mag‘lubiyatga uchratishi;
- Iroq terma jamoasi Vyetnamni mag‘lub etishi.
Avstraliya va Yaponiya ishtirokidagi o‘yinlar O‘zbekiston — Bahrayn bellashuvidan 3—4 soat ertaroq boshlanishini inobatga olsak, “Bunyodkor” stadionidagi uchrashuv boshlanguncha O‘zbekiston terma jamoasi saralashning 3-bosqichiga chiqib bo‘lishi mumkin. Mabodo bellashuvga qadar hali hech narsa aniq bo‘lmasa, Bahraynga qarshi o‘yinda mag‘lubiyatdan boshqa har qanday natija O‘zbekiston terma jamoasini 3-saralash bosqichiga olib chiqadi.
Izoh (0)