USM Holdings aksiyadorlari Alisher Usmonov, Vladimir Skoch, Farhod Moshiriy, Ivan Tavrin va Ivan Streshinskiylar hamkorlikda yangi investitsion jamg‘arma tashkil etdi. “RBK” nashrining ma’lum qilishicha, jamg‘armaning kapitali 1 milliard dollarni tashkil qiladi.
Hozircha yangi tuzilma portfelida 7 ta xorijiy IT-loyiha bor. Jamg‘arma texnologik kompaniyalarga investitsiyalar kiritadi. Ular orasida dunyodagi eng yirik taksi agregatori Uber hamda uning Xitoy va Hindistondagi muqobillari — Didi Kuaidi va Ola Cabs, Xitoyning smartfon va planshetlar ishlab chiqaruvchi Xiaomi kompaniyasi, shuningdek, Hindistonning eng yirik internet-do‘konlaridan biri — Flipkart bor.
Aytilishicha, jamg‘arma 2014-yildayoq tuzib bo‘lingan. Shunga qaramay, uning nomi oshkor qilinmayapti.
Jamg‘armada investorlar ulushlari ularning USM Holdings’dagi ulushlariga muvofiq ravishda belgilangan. Xoldingning eng yirik aksiyadori Alisher Usmonov bo‘lib, unga tuzilmaning 48 foizi tegishli. Aksiyalarning 30 foizi Vladimir Skochga, 10 foizi xolding direktorlar kengashi raisi Farhod Moshiriyning trastiga, 3 foizi “MegaFon” bosh direktori Ivan Tavringa, qolgani esa USM menejmenti va shu’ba korxonalariga tegishli.
Ma’lum bo‘lishicha, investitsion kompaniya asosan Osiyo bozoriga qiziqish bildirmoqda. U ishtirok etayotgan loyihalarning aksariyati aynan Osiyodadir.
Izoh (0)