Ertaga, 2-mart kuni Osiyo Chempionlar Ligasining “D” guruhi 2-turi doirasida Qarshining “Nasaf” jamoasi o‘z maydonida Saudiya Arabistonining “Al-Ahli” futbolchilarini qabul qiladi. Ushbu o‘yin oldidan o‘tkazilgan matbuot anjumanida “Nasaf” bosh murabbiyi Ro‘ziqul Berdiyev va himoyachi Maqsud Karimov ishtirok etdi, deb xabar beradi “Voha.uz”.
– Barchani futbol bayrami boshlanishi bilan tabriklayman. Ertangi o‘yinga keladigan bo‘lsak, raqibimiz juda kuchli, ammo o‘tgan o‘yinni ko‘rgan bo‘lsangiz, bu jamoa bilan o‘ynasa bo‘ladi. Shuning uchun ushbu o‘yinga puxta tayyorgarlik ko‘rdik va o‘ylaymanki, yaxshi natijani qo‘lga kiritamiz, — deydi Ro‘ziqul Berdiyev.
– Nega o‘tgan o‘yinda ayrim o‘yinchilar maydonga tushmadi?
– Chernogoriyalik legionerimiz Deyan Bolyevichning skautlari bizga yetarli hujjatlarni o‘z vaqtida yetkazib bera olmagani uchun, u OFK qaydnomasiga kiritilmadi. Saydullo Rahmatovning esa viza masalasida muammolar paydo bo‘ldi. Bunga jamoamiz ma’murlarining sustkashlikka yo‘l qo‘ygani sabab bo‘ldi. Bahrom Abdurahimovga kelsak, o‘zingizga ma’lum, uning o‘tgan mavsumda olgan qizil kartochkasi bor edi va shu tufayli u ham maydonga tushmadi. Ertaga biz Saydulloning ham Bahromning ham xizmatidan foydalanishimiz mumkin.
“Nasaf” klubi himoyachisi Maqsud Karimov ham o‘z fikrlarini aytib o‘tdi.
– Nasib qilsa, ertaga muxlislarni xursand qilish uchun maydonga tushishga tayyormiz. O‘n ikkinchi o‘yinchi vazifasini o‘tab beradigan muxlislardan umidimiz katta, — deydi Maqsud Karimov.
– Maqsud, o‘tgan o‘yinda “Nasaf” har ikki bo‘limning boshida gol o‘tkazib yubordi. Bunga sabab nima?
– Murabbiylar doimo bizga o‘yin boshida ham, o‘yin davomida ham hushyorlikni yo‘qotmaslikni tayinlaydi. Albatta, bu gollarda biz himoyachilarning ham aybi bor, o‘sha vaziyatlarda diqqatimizni yo‘qotgandik. O‘ylaymanki, bu holat endi takrorlanmaydi.
“Nasaf” — “Al-Ahli” uchrashuvi ertaga, 2-mart kuni Qarshidagi “Markaziy” stadionida, Toshkent vaqti bilan 18:00 da boshlanadi.
Eslatib o‘tamiz, OChL–2016 guruh bosqichining 1-turida “Nasaf” safarda “Al-Ahli” mehmoni bo‘lib, 1:2 hisobida mag‘lubiyatga uchragandi.
Izoh (0)