Rossiyaning Vorkuta shahridagi “Olimp” sport kompleksida bir necha ming kishi “Shimoliy” konida halok bo‘lgan to‘rt nafar konchi bilan xayrlashish uchun keldi. Marosimda Rossiya FVV rahbari Vladimir Puchkov va Komi rahbari vazifasini bajaruvchi Sergey Gaplikov ishtirok etdi, deya xabar beradi “TASS”.
Ta’ziya bildirish uchun nafaqat konchilarning yaqinlari va do‘stlari, balki hamkasblari hamda qutqaruvchilar ham keldi. Komi rahbari o‘z chiqishida avariya yuz berganligi holati bo‘yicha jinoiy ish ochilganligini eslatib o‘tdi.
“Hozir tergov brigadalari tomonidan hodisa sabablari sinchiklab o‘rganilmoqda. Tergov yakunlangach, uning xulosalaridan barchamiz xabardor bo‘lamiz. Mazkur fojia aybdorlari aniqlanishi va tegishli jazo olishlariga ishonchim komil”, — deya ta’kidlagan Gaplikov.
Eslatib o‘tamiz, 25-fevral kuni “Shimoliy” konida metan portlashi tufayli 4 kishi halok bo‘lgan, 26 kishi qamalda qolgandi. Portlash chog‘ida konda 111 kishi bo‘lgan, ulardan 81 kishi yuqoriga olib chiqilgan.
28-fevralga o‘tar kechasi konda qidiruv-qutqaruv ishlari vaqtida yana bir portlash sodir bo‘ldi. Natijada besh nafar qutqaruvchi va bir nafar konchi halok bo‘ldi.
Rossiya Favqulodda vaziyatlar vaziri “Shimoliy” konida qamalda qolgan 26 konchining tirik ekanligiga umid yo‘qligini bildirgandi.
Izoh (0)