Kecha, 27-fevral oqshomida Toshkentdagi “O‘zbekiston” sport saroyida Butunjahon boks seriyasi (WSB)ning VI mavsumidan o‘rin olgan navbatdagi janglar o‘tkazildi. Unda Uzbek Tigers jamoasi musobaqaning amaldagi chempioni Qozog‘istonning Astana Arlans bokschilariga qarshi ringga ko‘tarildi, deb xabar beradi “Olamsport”.
Murosasiz kechgan bahslarda o‘zbekistonlik bokschilar raqiblarini 4:1 hisobida mag‘lub etdi. -49 kilogramm vazn toifasida ringga ko‘tarilgan Hasanboy Do‘smatov raqibi Temirtas Jusupovni 3:0 hisobida yengdi. -56 kilogramm vazndagi o‘zbekistonlik charm qo‘lqop ustasi Abdulhay Shorahmatov ham raqibi Meirbolat Toitovni 3:0 hisobida mag‘lubiyatga uchratdi.
-64 kilogramm vaznda ringga chiqqan Fazliddin Meliboyev raqibi Asxat Ualixanovni 3:0 hisobida taslim etdi. -75 kilogramm vazndagi O‘zbekiston vakili Xurshid Normatov Meyirim Nursultanovga 0:3 hisobida imkoniyatni boy bergan bo‘lsa, -91 kilogramm vazndagi Mirzabek Hasanov esa Yerkin Muhamedjanni 3:0 hisobida dog‘da qoldirdi. Shu tariqa, Uzbek Tigers jamoasi 4:1 hisobida g‘alaba qozondi.
Eslatib o‘tamiz, 26-fevral, juma kuni o‘tkazilgan janglarda Uzbek Tigers jamoasi Puerto-Rikoning Puerto Rico Hurricanes bokschilarini 5:0 hisobida mag‘lub qilgandi.
Shuningdek, kecha, 27-fevral kuni APB yo‘nalishida tashkil etilgan har ikki jangda ham o‘zbekistonlik bokschilar raqiblarini mag‘lub etishning uddasidan chiqdi. -81 kilogramm vazn toifasidagi O‘zbekiston vakili Zuhriddin Mahkamov ruminiyalik Aleksandr Machedonni 3:0, +91 kilogramm vazndagi o‘zbekistonlik Ulug‘bek Mubinov esa murosasiz kechgan jangda xorvatiyalik Marin Mindolevichni 3:0 hisobi bilan mag‘lubiyatga uchratdi.
Izoh (0)