Xalqaro futbol federatsiyasi (FIFA) tomonidan diskvalifikatsiya qilingan Indoneziya va Kuvayt futbol federatsiyalari bugun, 26-fevral FIFA prezidentini saylashda ovoz berish huquqidan mahrum qilindi. Bu haqda “TASS” xabar bermoqda.
Navbatdan tashqari tashkil qilingan FIFA kongressida tashkilotga a’zo 209 mamlakatdan 207 tasi ovoz beradi. Indoneziya va Kuvaytni FIFA a’zoligidan chiqarib tashlash haqidagi yakuniy qaror 2016-yilning may oyida qabul qilinadi.
FIFA prezidentligiga Osiyo futbol konfederatsiyasi rahbari Shayx Salmon bin Ibrohim al-Xalifa, UEFA bosh kotibi Janni Infantino, Iordaniya shahzodasi Ali bin al-Husayn, FIFA bosh kotibi sobiq o‘rinbosari Jerom Shampan va janubiy afrikalik Tokio Sexvale da’vogarlik qilmoqda.
Qayd etish joiz, Kuvayt futbol uyushmasi o‘tgan yilning oktabr oyida, mamlakat hukumati tashkilotning ishlariga aralashgani sabab FIFA a’zoligidan diskvalifikatsiya qilingan. Indoneziya futbol federatsiyasining FIFA a’zoligi o‘tgan yilning 30-mayida, mamlakatning sport vazirligi bilan kelib chiqqan mojaro tufayli vaqtincha to‘xtatilgan. Ushbu mamlakat terma jamoalari FIFA bayrog‘i ostida o‘tkaziladigan turnirlarda ishtirok etish huquqidan mahrum qilingan.
Eslatib o‘tamiz, Markaziy Osiyo futbol uyushmasi (CAFA), Sharqiy Osiyo futbol federatsiyasi (EAFF), hamda Janubiy Osiyo futbol federatsiyasi (SAFF) FIFA prezidentligi uchun saylovda Shayx Salmon bin Ibrohim al-Xalifa nomzodini qo‘llab-quvvatlaydi.
Izoh (0)