23-fevral klublar o‘rtasidagi Osiyo chempionlar ligasi musobaqasiga start beriladi. Bo‘lajak turnirda porlashi kutilayotgan “Paxtakor” jamoasi hujumchisi Igor Sergeyev OFK rasmiy saytining nazariga tushdi.
Toshkentning “Paxtakor” safida O‘zbekiston chempioni hamda mamlakat to‘purariga aylangan Igor Sergeyev o‘zbek futboli namoyondalari Igor Shkvirin va Aleksandr Geynrix davomchisi sifatida e’tirof etilmoqda.
“Aprel oyida 23 yoshini qarshilaydigan hujumchi shu kungacha Osiyo chempionlar ligasi bahslarida 18 marotaba maydonga tushib, 3 ta gol kiritishga muvaffaq bo‘lgan. Tajribali hujumchi raqib jarima maydonchasida himoyachilarga muammolar tug‘dirishga va sermahsul o‘yin ko‘rsatishga qodir”, — deyiladi saytda.
Shuningdek, OFK rasmiy sayti OChL-2016 musobaqasida “Paxtakor” tarbiyalanuvchilari Jamshid Iskanderov, Jaloliddin Masharipov hamda Vladimir Kozak yorqin o‘yinlari bilan ajralib turishga qodir ekanini ta’kidlab o‘tgan.
Qayd etish joiz, “Paxtakor” Osiyo chempionlar ligasi “C” guruhidan o‘rin olgan. Uning raqiblari “Al Hilol” (Saudiya Arabistoni), “Traktorsozi” (Eron) va “Al Jazira” (BAA) jamoalari bo‘ladi.
Eslatib o‘tamiz, “Paxtakor” OChL-2016 guruh bahslaridagi ilk o‘yinini Toshkentda, “Al Hilol” jamoasiga qarshi o‘tkazadi. Ushbu o‘yin 24-fevral, chorshanba kuni “Paxtakor” markaziy stadionida, soat 16:30 da boshlanadi.
Izoh (0)