Futbol bo‘yicha Osiyo Chempionlar Ligasi bahslari sabab, Sergey Lushchan “Bunyodkor” bosh murabbiyi aylandi. Shu vaqtgacha bu haqda rasman e’lon qilinmagan edi.
“Bunyodkor” futbol klubi 9-fevral, seshanba kuni Osiyo Chempionlar Ligasi pley-off saralash bosqichi doirasida BAAning “Ash-Shabob” jamoasiga bahs olib boryapti (mazkur xabar tayyorlanayotgan vaqtda uchrashuvning birinchi taymi yakuniga yetgandi, unda 2:0 hisobida “Bunyodkor” g‘alaba qozonayotgandi).
Ushbu uchrashuv arafasida tashkil etilgan matbuot anjumanida Sergey Lushchan jamoa bosh murabbiyi sifatida tanishtirildi, u shu maqomda jurnalistlarning savollariga javob qaytardi.
Sergey Lushchan 2014-yilning iyunida “Bunyodkor” bosh murabbiyi etib tayinlangan, biroq 2015 yil sentabrida iste’fo berib, avvalgi lavozimi — klub futbol maktabi direktorligiga qaytgandi. “Bunyodkor”ning O‘zbekiston chempionati va kubogidagi ishtiroklari uchun javobgarlik mas’uliyati esa klub bosh direktori Baxtiyor Boboyevga yuklatilgan edi.
“Bunyodkor” FK matbuot xizmati 2015-yil 14-dekabr kuni Sergey Lushchan klub sport direktori etib tayinlangani haqida, 2015 yil 15-dekabr kuni esa “Bunyodkor”ning asosiy tarkib mashg‘ulotlariga Baxtiyor Boboyev va Sergey Lushchan juftligi boshchilik qilishi haqida xabar bergan edi.
Biroq shu vaqtgacha hech bir o‘rinda Sergey Lushchan jamoa bosh murabbiyi sifatida tanishtirilmagan edi. Xususan, “Ash-Shabob”ga qarshi o‘yin arafasida Toshkentda va BAAda tashkil etilgan o‘quv-mashg‘ulot yig‘inlaridan tayyorlangan reportajlarda ham jamoa Baxtiyor Boboyev boshchiligida shug‘ullanayotgani haqida aytilgandi.
Qayd etish joiz, OChL reglamentiga ko‘ra, musobaqada ishtirok etayotgan jamoaning bosh murabbiyi bo‘lishi shart, bu vazifasini klub rahbarlaridan biri birgalikda bajarishi mumkin emas.
Izoh (0)