Brent markasidagi neft narxi bir barrel uchun 35 dollardan oshdi

AQShda neft zaxiralari ko‘paygani haqidagi ma’lumotlarga qaramay, dollar kursi pasayishi tufayli neft narxi asta-sekin ko‘tarilib bormoqda. Bu haqda “Interfaks” xabar berdi.

4-fevral, payshanba kuni Londonning ICE Futures birjasida Brent turidagi neft uchun aprel shartnomalari kotirovkasi 0,5 foizga ko‘tarilib, bir barrel uchun 35,22 dollarni tashkil etgan. Nyu-York tovar birjasida esa WTI turidagi neftning mart oyida yetkazilib beriladigan fyucherslari kotirovkasi 0,6 foizga oshgan va bir barrel uchun 32,49 dollardan iborat bo‘lgan.

AQSh energetika vazirligi tomonidan e’lon qilingan ma’lumotlarga ko‘ra, mamlakatdagi neft zaxiralari o‘tgan haftada 7,79 million barrelga ko‘paygan. Dollar kursining asosiy dunyo valyutalariga nisbatan pasayishi esa 3-fevral, chorshanba kuni 1,9 foizga yetgan.