AQSh prezidenti matbuot kotibi mamlakat moliya vazirining Putinning korrupsiyalashganligi haqidagi bayonotiga qo‘shildi

AQSh ma’muriyati moliya vazirining Rossiya prezidenti Vladimir Putinning korrupsiyalashganligi haqidagi bayonotini o‘z pozitsiyasini eng yaxshi ifodasi deb hisoblaydi. Bu haqda AQSh prezidenti Barak Obamaning matbuot kotibi va Oq uyning rasmiy vakili Josh Ernest jurnalistlar bilan brifing chog‘ida ma’lum qildi, deb xabar beradi “Gazeta.ru”.

“Moliya vazirining ushbu bayonoti ma’muriyatning qarashlarini eng yaxshi tarzda ifodalaydi”, — dedi u.

U, shuningdek, aynan moliya vaziri sanksiyalarni uzaytirish haqidagi qarorning qabul qilinishi uchun javob berishini ta’kidladi.

Avvalroq Rossiya prezidenti Vladimir Putinning matbuot kotibi Dmitriy Peskov AQSh moliya vazirining Putinning korrupsiyaga aloqadorligi haqidagi bayonotini uydirma deb atagan edi.