AQShda yuz bergan “asr qor bo‘roni” oqibatida qurbon bo‘lganlar soni kamida 25 kishiga yetdi. Bu haqda Associated Press bergan ma’lumotlarga asosan “Korrespondent.net” xabar qilmoqda.
Oldinroq AQShning sharqiy qirg‘og‘iga yopirilgan qor bo‘roni tufayli 19 kishi halok bo‘lgani xabar qilingandi.
Ma’lum qilinishicha, odamlarning o‘limiga asosan yo‘l-transport hodisasi, is gazidan zaharlanish hamda qorni tozalash vaqtida sodir bo‘lgan yurak xuruji sababchi bo‘lgan.
Bundan tashqari, noqulay ob-havo tufayli AQShda 7,6 mingta reys bekor qilindi. Nyu-York shtatida esa, qor yog‘ishi sabab bo‘lib, avtomashina qatnovi vaqtinchalik to‘xtatildi.
11 ta shtat, shu jumladan, Nyu-Jersi, Pensilvaniya, Virginiya, Merilend, Shimoliy Karolina va Jorjiya gubernatorlari tomonidan favqulodda holat joriy etildi.
Amerikaning United Airlines aviakompaniyasi Vashington hududidagi reyslarini bekor qildi. Kompaniya o‘zining xizmatini 25-yanvar, dushanba kunidan boshlab tiklamoqchi.
Izoh (0)