AQShda qor bo‘roni tufayli nobud bo‘lganlar soni 19 kishiga yetdi

AQShning sharqiy qirg‘og‘iga 22-yanvar, juma kuni yopirilgan qor bo‘roni tufayli kamida 19 kishi halok bo‘ldi. Ular Nyu-York, Merilend, Virginiya, Arkanzas, Shimoliy Karolina, Kentukki, Ogayo va Tennessi shtatlari fuqarosi ekanligi qayd etilgan, deya xabar beradi Meduza.

Qurbonlarning aksariyati (13 kishi) yomon ob-havo bilan bog‘liq avtohalokatlarda nobud bo‘lgan. Ikki nafar virginiyalik sovuqdan o‘lgan, uch nafar Nyu-yorklik va bir nafar Merilendda istiqomat qiluvchi shaxs qorni kurash paytida halok bo‘lgan.

AQSh bo‘ylab jami 20 shtatda yashovchi 85 milliondan ziyod kishi bo‘ron qurshovida qoldi. Eslatib o‘tamiz, oldinroq mamlakatga yopirilgan qor bo‘roni 9 kishining o‘limiga sabab bo‘lgani bildirilgandi.