“Aloqabank” plastik karta egalari uchun yangi — “Aloqabank”ning bir plastik kartasidan “Aloqabank”ning ikkinchi plastik kartasiga texnik vositalar, masalan, smartfon orqali pul o‘tkazish (P2P) imkoniyatini taqdim etdi. Hozirga qadar O‘zbekistonning hech bir moliya muassasasi o‘z mijozlariga bunday xizmatni taklif qilgan emas.
2. P2P nima?
UzCard milliy to‘lov tizimi ma’lumotlariga ko‘ra, axborot-texnologik yechimlar majmui hisoblangan P2P xizmati yordamida, deylik, “A” degan bankning kartasi egasi mobil dastur, veb-interfeys yoki boshqa texnik vosita orqali o‘sha “A” yoki boshqa “B” bankning mijozi hisoblangan qabul qiluvchining kartasiga pul mablag‘larini o‘tkazish mumkin.
3. Click’da bunaqa xizmat allaqachon bor edi, shekilli?
Yo‘q. Click taklif qilayotgan xizmatlar orasida “Transfer” xizmati bor — kompaniya saytida berilgan yo‘riqnomalarda Click foydalanuvchisi shu xizmat orqali kartadagi pul mablag‘larini boshqa bir Click foydalanuvchisi hisobiga o‘tkaza olishi haqida ma’lumot berilgan. Biroq, kompaniya Kontakt-markazi bu xizmat hozirda faqat test rejimida ishlayotganini ma’lum qildi. Xizmatdan foydalanishga muvaffaq bo‘lgan foydalanuvchilarning qayd etishicha, Click’da ko‘rsatilgan xizmat sizning plastik kartangizdagi pulni boshqa Click foydalanuvchisining plastik kartasi hisobiga emas, balki Click doirasidagi hisobiga tushiradi.
4. Pulni qanday o‘tkazaman?
Uzcard milliy to‘lov tizimida ro‘yxatdan o‘tish kerak. Tizimda veb-sayt orqali ham ro‘yxatdan o‘tish mumkin, lekin Uzcard’ning mobil dasturi ko‘p jihatdan qulay. Ro‘yxatdan o‘tib bo‘lganingizdan so‘ng, pul o‘tkazish formasiga to‘lovni qabul qilib oluvchining kartasi raqami va o‘tkaziladigan summani kiritish kerak. “Aloqabank”ning Plastik kartochkalarni boshqarish bo‘limi boshlig‘i Naima Mirzayevaning “Daryo”ga ma’lum qilishicha, fevral oyi oxirlaridan boshlab, bank saytidagi personal sahifa orqali ham plastik kartadagi pul mablag‘larini o‘tkazish/qabul qilish mumkin bo‘ladi.
5. Kartamda 5 million bor, hammasini birdan boshqa kartaga o‘tkaza olamanmi?
Yo‘q. Bir oyda bir kartadan boshqa kartalarga o‘tkazilgan pul mablag‘lari miqdori 1 million so‘mdan oshib ketmasligi kerak. Yodda tutish lozim: “Aloqabank” har bir o‘tkazmadan kamida 100 so‘m, ko‘pi bilan o‘tkazilayotgan pul miqdorining 2 foizi miqdorida xizmat haqi oladi. Deylik, 1 so‘mni boshqa kartaga o‘tkazsangiz, “Aloqabank” xizmat haqi uchun sizdan 100 so‘m yechib oladi, birdan 1 million o‘tkazsangiz, xizmati uchun 20 ming so‘m olinadi.
6. Qoyil, endi plastik kartadan to‘yona beraversam bo‘larkan-da?
Albatta! Quyidagi shartlar bajarilsa kifoya: siz ham, to‘y egasi ham “Aloqabank” plastik kartasidan foydalanishingiz kerak (hozircha), sizning ham, to‘y egasining ham kartasi onlayn tizimida ishlashi kerak, o‘tkaziladigan pul miqdori 1 milliondan oshib ketmasligi kerak.
Izoh (0)