O‘zbekistonlik sinoptiklar 2015-yilda mamlakatda kuzatilgan ob-havo borasidagi xulosalar bilan bo‘lishdi, shuningdek, qishning iliq haroratiga qanday omillar sabab bo‘layotganini tushuntirib berdi, deb yozadi “Darakchi”.
Vazirlar Mahkamasi huzuridagi Gidrometeorologiya markazi bosh sinoptigi Irina Zayseva Toshkent observatoriyasi ma’lumotlariga tayanib, Toshkent uchun 2015-yil meteokuzatuvlarda eng issig‘i bo‘lmagani, u 2004-rekord yildan biroz ortda qolayotganini ta’kidladi. O‘rtacha yillik harorat 2015-yilda Selsiy bo‘yicha 15,8 darajaga teng bo‘ldi, bu 2004-yildagidan 0,1 darajaga past.
2015-yilning ahamiyatli tomoni to‘rt mavsumda ham iqlim me’yoridan iliqroq bo‘ldi, eng sezilarli farq (+2,7 daraja) qish mavsumiga to‘g‘ri keldi. Shuningdek, 2015-yilning ahamiyatli havo anomaliyasi mart oxiridagi sovuqlar bo‘ldi. Gap shundaki, mart oyining so‘ngida hamma joyda daraxtlar gullagan bir vaqtda Ural tumanlaridan keskin sovuq havo kirib keldi. 29—31 mart kunlari respublikaning barcha hududlarida qor yog‘di. Harorat kechasi 2—7 daraja sovuq bo‘ldi. Bu so‘nggi 50 yildagi eng sovuq mart bo‘ldi. 30—31 mart kunlari respublikaning aksariyat hududlarida meteokuzatuvlar tarixidagi eng past harorat qayd etildi.
2016-yilning yanvari boshlarida esa O‘zbekiston hududida 2015-yilning dekabr oyida qayd etilgan yuqori harorat saqlanib qolmoqda. Bunday iliq havoning sababi – atmosferadan janubiy-g‘arbiy oqimning ustunlik qilayotgani va u bilan chet janub hududlaridan respublika hududiga iliq va nam havoning kirib kelayotganidir.
Izoh (0)