KXDR mamlakat shimoli-sharqida vodorod bombasini muvaffaqiyatli tarzda sinovdan o‘tkazdi. Bu haqda Shimoliy Koreya markaziy televideniyesi e’lon qildi, deya xabar bermoqda “RBK”.
Hukumat bayonotida qayd etilishicha, agar mamlakat suverenitetiga daxl qilinmasa, Pxenyan yadroviy quroldan foydalanmaydi. Shimoliy Koreya o‘z yadroviy salohiyatini rivojlantirish bo‘yicha ishlarni davom ettirishni rejalashtirayotganini ham ma’lum qildi.
KXDR bungacha uch marta — 2006, 2009 va 2013-yillarda yadroviy sinovlarni o‘tkazgan. Joriy sinovlar Kim Chen In hokimiyat tepasiga kelganidan beri amalga oshirilgan ikkinchisidir. Bu kabi sinovlarni o‘tkazgani uchun, BMT Xavfsizlik kengashi KXDRga nisbatan sanksiyalar joriy etgan.
Janubiy Koreya razvedkasi uch kun avval KXDRdagi Pungeri poligonida faollikni qayd etgandi, bu holat Shimoliy Koreya yadroviy sinovlarni o‘tkazishga tayyorgarlik ko‘rayotgani bilan bog‘liq, deb taxmin qilingandi.
2015-yil dekabr oyida Shimoliy Koreya yetakchisi Kim Chen In KXDR o‘z suverenitetini nafaqat yadroviy, balki vodorod bombasi bilan ham mudofaa qila olish qobiliyatiga ega ekanligini e’lon qilgandi. Bu KXDR vodorod bombasi ustida ish olib borayotgani bilan bog‘liq ilk rasmiy bayonot edi.
6-yanvarga o‘tar kechasi qator mamlakatlarning seysmologiya xizmatlari Shimoliy Koreyadagi yadroviy poligonga yaqin hududda 5,1 magnitudali zilzila qayd etilgani, yerosti silkinishlariga texnogen omil (yadroviy sinovlar) sabab bo‘lgani haqida axborot bergandi.
Izoh (0)