Futbol bo‘yicha O‘zbekiston olimpiya terma jamoasi bosh murabbiyi Samvel Babayan yanvar oyida Qatarda bo‘lib o‘tadigan 23 yoshgacha bo‘lgan futbolchilar o‘rtasidagi Osiyo chempionatiga boradigan tarkibni e’lon qildi. Bu haqda O‘zbekiston Futbol Federatsiyasi matbuot xizmati xabar bermoqda.
Toshkent va Dubayda tashkil etilgan ikki bosqichli yig‘in davomida Samvel Babayan boshchiligidagi murabbiylar shtabi bir qancha nomzodlar orasidan 23 nafar futbolchini saralab oldi.
Ular orasida O‘zbekiston milliy terma jamoasining a’zolari — Javohir Sohibov, Dostonbek Hamdamov, Jamshid Iskanderov, Ikrom Aliboyev, Eldor Shomurodov va Igor Sergeyev kabi futbolchilar bor.
Tarkib asosan O‘zbekiston milliy chempionatida o‘ynaydigan futbolchilar hisobiga qurilgan bo‘lib, Serbiyaning “Yavor” klubi futbolchisi Xusniddin G‘ofurov terma jamoadagi yagona legionerdir.
O‘zbekiston olimpiya terma jamoasi 2016-yilning 2-yanvar kuni navbatdagi yig‘inda ishtirok etish uchun Dubayga jo‘nab ketadi. Yig‘in tugagach, delegatsiya Qatarga yo‘l oladi.
O‘zbekiston olimpiya terma jamoasining Osiyo chempionatida ishtirok etadigan tarkibi:
Darvozabonlar — Abdumavlon Abduljalilov (“Neftchi”), Javohir Ilyosov (“Mash’al”), Asilbek Omonov (“Qo‘qon-1912”);
Himoyachilar — Sardor Rahmonov (“Neftchi”), Abdulloh Olimov (“Paxtakor”), Maksimilian Fomin (“Buxoro”), Javlon Mirabdullayev (“Metallurg”), Muhsinjon Ubaydullayev (“Paxtakor”), Akromjon Komilov (“Bunyodkor”), Doston Tursunov (“Neftchi”), Jamshid Boltaboyev (“Paxtakor”), Vladimir Kozak (“Paxtakor”);
Yarim himoyachilar — Javohir Sohibov (“Paxtakor”), Otabek Shukurov (“Bunyodkor”), Doston Hamdamov (“Bunyodkor”), Jaloliddin Masharipov (“Paxtakor”), Temur Hakimov (“Oqtepa”), Jamshid Iskanderov (“Paxtakor”), Ikromjon Aliboyev (“Lokomotiv”), Husniddin G‘ofurov (“Yavor”, Serbiya);
Hujumchilar — Igor Sergeyev (“Paxtakor”), Eldor Shomurodov (“Bunyodkor”), Jasurbek Hakimov (“So‘g‘diyona”).
Ma’lumot uchun, O‘zbekiston terma jamoasi 12-yanvarda start oladigan Osiyo chempionatida Iroq, Janubiy Koreya va Yaman terma jamoalari bilan birga “C” guruhida joy egallagan. O‘zbekistonlik olimpiyachilar dastlabki uchrashuvni 13-yanvarda Janubiy Koreyaga qarshi o‘tkazadi. So‘ngra 16-yanvarda Iroq bilan, 19-yanvarda esa Yaman bilan o‘ynaydi.
Ushbu Osiyo chempionati 2016-yili Braziliyaning Rio-de-Janeyro shahrida tashkil etiladigan yozgi Olimpiadaga yo‘llanma beruvchi musobaqa bo‘lib, uch jamoa — chempionatning ikki finalchisi va 3-o‘rin uchun uchrashuv g‘olibi Olimpiya o‘yinlari yo‘llanmasini qo‘lga kiritadi.
Izoh (0)