O‘zbekiston mobil aloqa operatorlari Yangi yil oqshomida aloqa tarmog‘ida nosozliklar bo‘lmasligi, xususan, bayram tabriklari, qo‘ng‘iroqlari o‘z vaqtida amalga oshirilishi uchun tegishli choralar ko‘rmoqda, deya xabar bermoqda “Darakchi” gazetasi.
Xususan, “Bilayn-O‘zbekiston” o‘z SMS-markazida yuklamalar hajmi oshib ketmasligi uchun qisqa muddatli rejali ish tartibiga o‘tadi, asosiy tizimda esa profilaktik qayta yuklashni amalga oshiradi.
“31-dekabr kuni barcha hududlarda tarmog‘imiz sig‘imini kengaytiramiz. Unutmaslik kerakki, mobil operatorlarning sifatli ishlashi elektr ta’minotiga ham bog‘liq. 1-yanvarga o‘tar kechasi havo qancha sovuq bo‘lsa, yuklama ham shuncha ortadi”, — dedi “Bilayn-O‘zbekiston”ning jamoatchilik bilan aloqalar xizmati rahbari Oraz Abdurazzoqov.
UzMobile vakillarining ma’lum qilishicha, Yangi yil kechasi ishning avj nuqtasi 23:00 da boshlanadi. “O‘sha kuni operatorlarimiz sonini ko‘paytiramiz”, — deydi kompaniya call-markazi 1-toifali mutaxassisi Baxtiyor Mirhabibov. UMS operatori ham Yangi yil kechasida call-markazdagi operatorlar sonini oshirishini ma’lum qildi.
“Kompaniyaning texnik bloki maxsus ishlab chiqilgan reja asosida ishlayapti. Mazkur blok tarmoqni me’yoridan oshgan yuklamalar rejimiga ulaydi. Bu esa katta miqdordagi ovozli va internet trafigi intensivligini oshiradi. Yangi yil kechasida navbatchi guruhda texnik xodimlar bilan bir qatorda tarmoq qurilmalari muntazam monitoringini amalga oshirish uchun biriktirilgan maxsus xodimlar ham ishlaydi”, — dedi UMS matbuot kotibi Elina Sakayeva.
Izoh (0)