Taniqli bokschi kichik Roy Jons Rossiya fuqaroligini olganidan keyin birinchi jangda mag‘lubiyatga uchradi, deya xabar bermoqda “TASS”. U Moskvada bo‘lib o‘tgan o‘n raundli reyting jangida britaniyalik Enso Makkarinelliga to‘rtinchi raundda texnik nokaut bilan yutqazib qo‘ydi.
Avvalroq 46 yoshli Roy Jons ushbu jang karyerasidagi eng so‘nggisi bo‘lishini ma’lum qilgan edi. Ammo kurashdan bir necha kun avval bo‘lib o‘tgan matbuot anjumanida bokschi karyerasini davom ettirishini istisno qilmadi. Uning so‘zlariga ko‘ra, o‘zini yaxshi his qilsa bo‘ldi — boks tushishda davom etaveradi.
Eslatib o‘tamiz, Vladimir Putin 12-sentabr kuni Roy Jonsga Rossiya fuqaroligini berish to‘g‘risidagi farmonni imzolagan edi. Oktabr oxirida esa Roy Jons Rossiya fuqarosi pasportini oldi. Keyinroq bokschi Rossiya IIV Moskva bosh boshqarmasi boks federatsiyasining faxriy raisi bo‘ldi.
Izoh (0)