Afina Turkiya F-16 samolyotlarining Gretsiya havo hududini buzganligini ma’lum qildi

Turkiya Harbiy-havo kuchlariga qarashli oltita F-16 qiruvchi samolyoti Gretsiya havo hududini buzib o‘tdi. Bu haqda “RBK” Gretsiya Mudofaa vazirligi ma’lumotiga tayanib xabar beradi.

Mudofaa boshqarmasining ma’lum qilishicha, Turkiyaning F-16 qiruvchi samolyotlari 1-dekabr, seshanba kuni mahalliy vaqt bo‘yicha 15:01 da Lesbos va Xios orollaridan uchib o‘tib, mamlakat havo hududiga kirgan. Keyinroq qiruvchi samolyotlar ikki va to‘rtta samolyotdan iborat ikki guruhga bo‘lingan. 20 daqiqadan so‘ng ular Furni, Makronisos, Antropofagi va Agatonisi orollarining ustidan uchib o‘tgan.

To‘rtta qiruvchi samolyotdan iborat guruh 15:28 da, qolgan ikki F-16 esa 15:30 da Gretsiya havo hududini tark etgan.