Buxarestda yonib ketgan tungi klub egalari umrbod ozodlikdan mahrum etilishi mumkin

Ruminiya poytaxti Buxarestdagi yong‘in sabab 27 kishi halok bo‘lgan tungi klub egalari umrbod ozodlikdan mahrum etilishi mumkin. Bu haqda, “Korrespondent.net” xabariga ko‘ra, Ruminiya bosh prokurori Tiberiu Nitsu ma’lum qildi.

Nitsuning so‘zlariga ko‘ra, shifokorlar halok bo‘lgan 27 kishidan 23 nafarining shaxsini aniqlagan. Qurbonlar soni yanada oshishi mumkin, chunki kuchli kuyish jarohatlari bilan kasalxonaga yotqizilgan 146 jabrlanuvchidan 25 nafarining ahvoli og‘ir deya baholanmoqda.

Bosh prokurorning ta’kidlashicha, klub sobiq poyabzal fabrikasi o‘rnida faoliyat olib borgan va ko‘ngilochar muassasalar uchun mo‘ljallangan xavfsizlik qoidalari talablariga javob bermagan.

So‘roq vaqtida tungi klub egalari pirotexnikadan foydalangan holda shou tashkillashtirish uchun ruxsatnomaga ega bo‘lmaganliklarini tan olgan. Ma’lum bo‘lishicha, pulni tejash maqsadida inshoot oson alanga oluvchi materiallar bilan bezaklangan.