Misr hukumati Rossiyaning Metrojet (“Kogalimavia”) aviakompaniyasiga tegishli Airbus A321 layneri halokati natijasida samolyot bortidagi barcha yo‘lovchi va ekipaj a’zolari halok bo‘lganini rasman ma’lum qildi. Bu haqda, Sky News’ga asoslanib, Meduza xabar bermoqda.
Metrojet aviakompaniyasi layneri 31-oktabr, shanba kuni Toshkent vaqti bilan 8:51 da Misrning Sharm-ash-Shayx shahridan Sankt-Peterburg tomon havoga ko‘tarilib, 23 daqiqadan so‘ng radarlardan yo‘qolgan. Samolyot bo‘laklari Misrning Sinay yarimoroli shimolidan topildi.
Layner bortida, dastlabki ma’lumotlarga ko‘ra, 224 kishi bo‘lgan. Misr Transport vazirligi tomonidan taqdim etilgan ma’lumotlarga ko‘ra, samolyotda 63 nafar erkak, 138 nafar ayol va 2—17 yosh oralig‘idagi 17 nafar bola bo‘lgan va ularning barchasi Rossiya fuqarolari edi.
Avvalroq samolyot bo‘laklari ostidan omon qolganlarning ovozlari eshitilayotgani haqida xabar berilgan edi. Keyinroq, hodisa joyida 100 kishining jasadi topilgani haqida axborot berildi. Misr hukumati taxminiga ko‘ra, aviahalokatga samolyotdagi texnik nosozliklar sabab bo‘lgan.
Izoh (0)