Aktyor Jimmi Morales 25-oktabr, yakshanba kuni Gvatemala prezidentligi uchun bo‘lib o‘tgan saylovlarning ikkinchi turida g‘olib bo‘ldi, deb xabar beradi “RIA Novosti”.
Oliy saylov tribunalining ma’lumotlariga qaraganda, 95 foiz saylov uchastkalarida berilgan ovoz natijalariga ko‘ra, u deyarli 69 foiz ovoz to‘pladi. Moralesning raqibi Sandra Torres saylovchilarning 31 foizdan ko‘proq ovozini to‘pladi va o‘z mag‘lubiyatini tan oldi.
Morales g‘alaba haqida o‘zi e’lon qildi va korrupsiyaga qarshi kurashishga va’da berdi. U Gvatemalaning 50-prezidenti bo‘ldi.
46 yoshli Morales to‘rt nafar farzandning otasi bo‘lib, shu paytgacha komediya janridagi aktyor va rejissorlik faoliyati bilan shug‘ullanib kelgan. Shu bilan bir paytda u mudofaa va xavfsizlik sohasi bo‘yicha magistraturani tamomlagan.
Eslatib o‘tamiz, bundan oldingi Gvatemala prezidenti Otto Peres Molina sudya tomonidan uni hibsga olish haqida buyruq chiqarilganidan so‘ng, sentabr oyi boshida iste’foga chiqqan edi. U bojxona organlari faoliyatida fosh etilgan yirik korrupsiyaviy sxemaga aloqadorlikda gumon qilingan.
Izoh (0)