“Krasnogorsklik mergan”ning haydovchisi politsiyaga taslim bo‘ldi

Rossiyada “Krasnogorsklik mergan” Amiran Georgadzening haydovchisi huquqni muhofaza qilish organlariga taslim bo‘ldi, deb xabar beradi “Gazeta.ru”.

“Elis Barashvili ixtiyoriy ravishda taslim bo‘ldi, u bilan tergovchilar ishlamoqda”, — dedi Rossiya Tergov qo‘mitasi rasmiy vakili Vladimir Markin.

Haydovchining so‘zlariga qaraganda, u boshlig‘i skuterdagi nafaqaxo‘rni o‘ldirgunga qadar uning yonida bo‘lgan. Shundan so‘ng u qo‘rqib ketib, ixtiyoriy ravishda taslim bo‘lishga qaror qilgan.

“Voqealar rivoji quyidagicha bo‘lgan: dastlab ma’muriyat vakillari o‘ldirilgan, so‘ng qotil o‘zining kottejiga yo‘l olgan. U yerda unga katta miqdordagi pul berishi lozim bo‘lgan hamkoriga uchrashuv tayinlangandi”, — deb qo‘shimcha qildi Markin.

Eslatib o‘tamiz, mansabdor shaxslarni o‘ldirishda gumon qilinayotgan tadbirkor Amiran Georgadzening uyidan bir kishining jasadi topildi. Keyinroq bu uning biznes bo‘yicha sherigi Trestan Zakaidze ekanligi ma’lum bo‘ldi.