Toshkentlik professional aloqa xodimi Aleksey Tudakov Toshkent hayotining bir kunini aks ettiruvchi taymlaps videoni suratga oldi. Aleksey Facebook’dagi sahifasiga joylagan videoga izoh sifatida ushbu loyihani yaratishga qariyb ikki oy vaqt ketganini, bu uning birinchi tajribasi ekanligini qayd etdi.
“Daryo” muxbiri savollariga javob berar ekan, Aleksey ushbu videoni yaratishda Minsk shahri haqidagi taymlaps texnikasida yaratilgan rolikdan ilhom olganini ta’kidladi.
“Videoni bir necha sabablarga ko‘ra oldim. Ajoyib shahrimiz go‘zalligini o‘zim uchun kadrga muhrlamoqchi bo‘ldim. Ikkinchi sababi — xorijliklar va potensial sayyohlarga namoyish etish uchun. Hech qachon Toshkentni ko‘rmagan ko‘plab kishilar uni tasvirlab berishimni so‘raydi. Bu, menimcha, Toshkent qandayligini ko‘rsatishning eng yaxshi usuli. Uchinchi sababi shuki, chet elga ketgan do‘stlarim Toshkentning suratlarini so‘raydi, endi ular Toshkentni ko‘rib, sog‘inchini qondirishi mumkin”, — deya loyihadan ko‘zlagan maqsadlarini bir-bir oshkor etdi muallif.
Ma’lumot uchun, taymlaps — bu uzoq vaqt davomida qo‘zg‘almas yoki ravon harakat qiluvchi kamera yordamida olingan suratlar ketma-ketligidan yaratilgan video. Natijada “tezlashtirilgan syomka” hosil bo‘ladi, unda butun kun bir joyga yig‘ilib, ikki daqiqaga “aylanadi”.
Izoh (0)