Buyuk Britaniya bosh vaziri Devid Kemeron Birlashgan Qirollikni Yevropa Ittifoqi tarkibida saqlab qolishda yordam so‘rab, Germaniya kansleri Angela Merkelga murojaat qildi. Bu haqda “TASS” xabar bermoqda.
Kemeronning Merkel bilan uchrashuvi yakunlari haqida yozgan Financial Times gazetasining qayd etishicha, “aksariyati xedj-fondlarning boshliqlari hisoblangan Konservativ partiyaning nufuzli a’zolari o‘z moliyaviy resurslarini Yevropa Ittifoqidan chiqish kampaniyasini qo‘llab-quvvatlashga yo‘naltirishi mumkinligi bilan bog‘liq xavotirlar sabab, Kemeron Merkeldan Buyuk Britaniyani Yevroittifoq tarkibida saqlab qolishda yordam berishni so‘radi”.
“Kemeronning ittifoqchilari Bryussel bilan muzokaralar uzoq davom etishidan xavotirda — muloqot cho‘zilgani sayin, Yevropa Ittifoqidan chiqishga tashviqot qilish ham shunchalar osonlasha boradi. Xedj-fondlarning bir qator rahbarlari Konservativ partiyaning yirik homiylari sanaladi. Xususan, xedj-fond boshqaruvchisi Krispin Ospi Yevropa Ittifoqidan “Chiqish uchun ovoz ber” tashviqot harakatini qo‘llab-quvvatladi”, — deb yozadi gazeta.
Tashviqot kampaniyasi 9-oktabr, juma kuni bir qator siyosiy partiyalar tomonidan boshlandi. Buyuk Britaniyaning Yevropa Ittifoqiga a’zoligi to‘xtatilishini hukmron Konservativ partiya va muxolifatdagi Leyboristlar partiyasidan saylangan parlament a’zolari, shuningdek, britaniyalik yevroskeptiklarning asosiy kuchi — Birlashgan Qirollik mustaqilligi partiyasi (UKIP) yoqlab chiqmoqda.
Buyuk Britaniyaning Yevroittifoqqa a’zoligi masalasi bo‘yicha referendum, Kemeronning va’da qilishicha, 2017-yil oxirigacha o‘tkaziladi, biroq bir qator mahalliy OAV xabarlariga ko‘ra, referendum kelasi yiliyoq tashkil etilishi mumkin.
Bosh vazirning o‘zi mamlakat ittifoq tarkibida qolishini istamoqda. U Bryussel tomonidan Yevropa Ittifoqi isloh qilinishi va Buyuk Britaniyaga ba’zi vakolatlar qaytarilishiga erishmoqchi. Shunga qaramay, agar ittifoqning qolgan mamlakatlari yon berishni istamasa, Kemeron qirollikning Yevropa Ittifoqidan chiqishini qo‘llab-quvvatlashi mumkin.
Izoh (0)