FIFAning axloq qo‘mitasi tashkilot prezidentligiga nomzod bo‘lib turgan Chon Monjunni 15 yilga futboldan chetlatdi va endi u saylovlarda ishtirok eta olmaydi. Bu haqda Reuters agentligiga tayanib, “Arena.uz” xabar bermoqda.
Xabarda aytilishicha, 2010-yilda FIFA vitse-prezidenti bo‘lgan Monjun ijro qo‘mitasi vakillariga agar Janubiy Koreya JCh—2022 mezbonligini qo‘lga kiritsa, futbol rivoji uchun 777 million dollar ajratishni va’da qilgan.
Ta’kidlash kerakki, koreyalik amaldor ushbu qarorni o‘zini siyosiy kurashdan chiqarish uchun qilingan fitna, deb baholagan.
Eslatib o‘tamiz, FIFA prezidentligi uchun navbatdan tashqari saylovlar 2016-yil 26-fevralida o‘tkaziladi va nomzodlar 26-oktabrga qadar o‘z hujjatlarini taqdim qilishi lozim.
Ayni vaqtda FIFA korrupsion mojarolar markazida bo‘lib turibdi va tashkilotning ko‘plab amaldorlari hibsga olingan. Tashkilot prezidenti Blatterga esa Shveysariya prokuraturasi jinoiy ish ochgan.
Izoh (0)